Qyzylordada qalyń qar jaýyp, kólik qozǵalysyna shekteý qoıyldy

QYZYLORDA. QazAqparat - Qyzylorda oblysynda qar qalyń jaýyp qolaısyz aýa raıy qalyptasty. Osyǵan baılanysty Shıeli aýdany Báıgequm aýylynan Túrkistan oblysynyń shekarasyna deıingi aralyqta kólik qozǵalysyna ýaqytsha shekteý qoıyldy, dep habarlaıdy QazAqparat tilshisi.

Bul jóninde Qyzylorda oblystyq polıtsııa departamenti málim etti.

Departamenttiń habarlaýynsha, búgin, 23 qańtarda elorda ýaqytymen 12.15-ten bastap «Samara -Shymkent» avtokólik jolynyń 1912-2057 shaqyrymy aralyǵyndaǵy kólik qozǵalysyna ýaqytsha shekteý qoıyldy.

«Ol Shıeli aýdany Báıgequm aýylynan Túrkistan oblysynyń shekarasyna deıingi aralyqty qamtıdy. Júrgizýshilerge jolda abaı bolyp, jol erejesin saqtaýyn suraımyz. Jyldamdyqty asyrmaı, qaýipsiz qashyqtyqty saqtaý qajettigi týraly eskertemiz», - dedi atalǵan vedomstvodan.

«QazAvtoJol» AQ UK oblystyq fılıalynyń mamandary joldyń atalǵan aýmaǵyn tazartý jumystary júrgizilip jatqanyn habarlady. Oǵan qajetti tehnıkalar jumyldyrylýda.