Qyzylordada qaldyqsyz ónim shyǵaratyn zaýyt iske qosyldy
QYZYLORDA. QazAqparat - Qyzylorda oblysy Qarmaqshy aýdanyna qarasty Dúr Ońǵar aýylynda qaldyqsyz ónim shyǵaratyn zaýyt iske qosyldy, dep habarlaıdy QazAqparat tilshisi.
Atalmysh zaýytta kúrish shyǵarylady. Onda táýligine 65 tonna ónim daıyndaýǵa múmkindik bar. Kúrish qaldyǵy da qajetke jaraıdy. Odan mal azyǵy retinde 3 túrli ónim tutynýshyǵa jol tartady.
Burynǵy jyldarda kúrish kebegi eshbir kádege jaraı qoımaıtyn. Ádette, ol dalada qoqysqa aınalyp nemese ony dıqandar jaǵyp jiberýge májbúr bolatyn. Endigi kezekte mundaı olqylyqqa jol berilmeıdi. Osyndaı ońdy isterdiń nátıjesinde eldi mekendegi 15 adam kásip kózin taýyp otyr. Bul ıgilikti isti aýyldaǵy «Jańajol» sharýa qojalyǵy qolǵa aldy.
Byltyr sharýa qojalyǵy 3,2 myń gektarǵa kúrish ekti. Onyń ár gektarynan ortasha eseppen alǵanda 74 tsentnerden ónim keldi. Ol Syr óńirinde joǵary kórsetkishtiń biri sanalady.
«Burynǵy kúrish aqtaıtyn dıirmennen aıyrmashylyǵy kóp. Munda fotoseperator bar. Qyzyl kúrishten ajyratady. Aıta keterligi, saǵatyna 5 tonna kúrish shyǵarýǵa ábden bolady. Ónimdi elimizdiń birqatar óńirlerine jiberip jatyrmyz. Keleshekte eksportqa shyǵarýdy josparlap otyrmyz», - dedi sharýa qojalyǵynyń bas agronomy Tóleý Erǵalıev.
