Qyzylordada qala shetinen er adamnyń máıiti tabyldy

QYZYLORDA. QazAqparat - Qyzylordada qala shetinen denesinen zorlyq-zombylyq belgisi bar er adamnyń máıiti tabyldy. Ol birge ishimdik ishken tanystarynyń qolynan qaza tapqany anyqtaldy, dep habarlaıdy QazAqparat tilshisi.

Óńirde bıylǵy 5 aıda kisi qolynan 11 adam kóz jumdy. Osy is boıynsha 26 kúdikti anyqtaldy. Olardyń jartysy jumyssyzdar, buryn sotty bolǵandar men masań kúıde óz áreketine jaýap bere almaǵandar. Oqıǵanyń kóbisi qoǵamdyq oryndarda bolǵan.

Oblystyq prokýratýra tarapynan júrgizilgen taldaý-zerdeleý jumystarynyń nátıjesinde aýyr jáne asa aýyr qylmystardyń basty sebebi anyqtaldy. Bul qylmystyń basym kópshiligi otbasyndaǵy daý, kıkiljiń, túsinbeýshilik, jumyssyzdyq, ishimdikke salyný, bir-birine aýyr sóz aıtý, ar-namysyn qorlaý sekildi jaǵdaılardan týyndaǵan.

«Qala turǵyny spırttik ishimdikke salynyp ketken ákesin izdep polıtsııaǵa habarlaǵan. Tergep-tekserý barysynda qala shetinen ákesiniń zorlyq-zombylyq belgisi bar máıiti tabyldy. Bul oqıǵaǵa qatysty ákesiniń bótelkeles tanystary ustaldy. Olar qylmystyq áreketin jasyrý úshin múrdeni qala shetine aparyp kómip tastaǵan», - dep málim etti Qyzylorda oblystyq prokýratýrasynan.

Eske salsaq, budan buryn Ońtústik Koreıaǵa vıza jasap berem dep 5 adamdy aldaǵan qyzylordalyq áıel ustaldy.