Qyzylordada qala men oblys turǵyndaryna psıhologııalyq kómek kórsetetin ortalyq ashyldy
QYZYLORDA. QazAqparat- Qyzylordada alǵash ret biregeı «Sana-Sezim» psıhologııalyq kómek jáne psıhokorrektsııa ortalyǵy ashyldy, dep habarlady qala ákimdiginiń baspasóz qyzmetinen.
Ortalyq jetekshisi Raýshan Bazarbaıdyń aıtýynsha, osy mekeme qala men oblys turǵyndaryna psıhologııalyq kómek kórsetý boıynsha keshendi jumys jasaıtyn bolady. Munda túrli saladaǵy mamandar: narkologtar, psıhologtar, balalar psıhology, kópsalaly art-terapevter, qum anımatorlary, rýhanı ıoga terapevteri jumys isteıdi. Ortalyqtyń qyzmet salalary ártúrli bolǵanymen, olardyń barlyǵy adamnyń rýhanı saýyǵýyna baǵyttalǵan. Munda relaksatsııalaýǵa arnalǵan bólmeler, balalar psıhology, psıhoterapııa kabınetteri, úlken jáne kishi trenıngtik zaldar bar.
Shara barysynda «Sana-Sezimniń» bas dárigeri, joǵary sanattaǵy narkolog, psıhıatr Aqtoty Álnazarova ortalyqtyń barlyq oblystyq ári jalpyulttyq deńgeıdegi múddeli qurylymdarmen baılanysta bolatynyn jetkizdi.
«Ortalyqtyń qyzmeti, ıaǵnı bilikti psıhologııalyq kómek kórsetý, kásibı etıka qaǵıdalaryn qatań saqtaý kásibılikke negizdeledi. Oǵan qosa, basty prıntsıpterimizdiń biri - qupııalylyq.
Bizdiń paryzymyz - onyń jany nege qınalatynyn túsinip, jan máselesiniń tıimdi sheshimin tabý», deıdi ortalyq mamandary.
