Qyzylordada qala kúni merekesinde bir mezette 40 qazan palaý basyldy

QYZYLORDA. QazAqparat – Bıyl Qyzylorda qalasy kúnin merekeleý aıasyndaǵy túrli formattaǵy is-sharalar bir aı boıy ótkiziledi. Osy maqsatta búgin «Syr ana» monýmenti alańynda 10 myńnan astam adamnyń qatysýymen «Aýylym – berekeniń aq besigi» atty etno baǵyttaǵy merekelik is-shara uıymdastyryldy, dep habarlaıdy QazAqparat tilshisi.

«Abaı-Dáýlet» JShS-niń qoldaýymen uıymdastyrylǵan jıynda palaýshylar saıysqa tústi. Dýmandy sharada bir mezette 10 myń turǵynǵa arnalǵan 40 qazan kúrish basylyp, saıys jeńimpazdary anyqtaldy. І oryn ıelengen azamatqa 150 myń teńgeniń sertıfıkaty tabystaldy.

Atalǵan sharaǵa oblys ákimi Nurlybek Nálibaev, aıtysker-aqyn Amanjol Áltaev, «Habar» agenttigi AQ basqarma tóraǵasy Berik Ýálı jáne ózge de azamattar qatysty. Aımaq basshysy qyzylordalyqtardy qala kúnimen quttyqtap, kúrishti aımaqta palaýshylar saıysyn uıymdastyrýdyń túp-tamyrynda ulttyq salt-dástúr jatyr dedi.

«Barshańyzdy Syr óńiriniń bas shahary – Qyzylorda qalasynyń kúnimen shyn júrekten quttyqtaımyn! Qyzylorda – tarıhı astana, ultym dep soqqan uly júrekterdiń, Alash arystarynyń izi qalǵan qasıetti jer! Qala kúni merekesin toılaý árbir jerlesimiz úshin mańyzdy ári mereıli sát dep sanaımyn. Bir aı kóleminde túrli sıpattaǵy aýqymdy is-sharalarmen jalǵasatyn dýmandy basqosýlar berekeli kúzdiń «Altyn dán» merekesimen sabaqtasady. Aq kúrishtiń aımaǵy atanǵan aıtýly Syr elinde palaý pisirýshilerdiń basyn qosqan úlken saıysty etnoaýyl formatynda uıymdastyrýdyń sımvolıkalyq máni bar dep sanaımyn», - dedi N. Nálibaev.

Merekelik basqosýda Amanjol Áltaev kúrishti aımaq Syrdyń jerindegi dýmandy sharanyń mán-mańyzy erekshe ekenin tilge tıek etip, qyzylordalyqtardy merekemen quttyqtady.

«Darııanyń qos qanatyna qonystanǵan Qyzylordanyń qala kúni merekesi qutty bolsyn! Syrdyń aq kúrishin oıymyzǵa oralǵanda kúrishtiń atasy Ybyraı Jaqaev júregimizdiń tórinen oryn alady. Ybyraı atamyzdyń jolyn jalǵap, baba amanatyn arqalaǵan dıqanshylar úlken eńbek kóshiniń basynda keledi. Syr eliniń kúrishi – baılyqtyń, berekeniń belgisi. Búgin 40 qazanǵa palaý pisirip, eldiń berekesi molaıa tússe eken degen ıgi bastama qolǵa alynǵan eken. Eldiń berekesi tarqamasyn, yrysy ortaımasyn», - dedi Amanjol Áltaev.

Etnoaýyl formatyndaǵy sharada Y. Jaqaevtyń «Kúrish týraly tolǵanysynan» úzindi keltirilip, qazaqtyń dástúrin nasıhattaıtyn aýyl jastarynyń altybaqan janyndaǵy kóńildi keshiniń kórinisi, aqyndar aıtysy, «Baýyrsaq PARTY», «Shubat-qymyz FEST», «Qaýyn-qarbyz FEST» festıvalderimen jalǵasty.

Eske salsaq, budan buryn Qyzylorda oblysynyń ákimi eńbekten bereke tapqan úlgili otbasylarmen kezdesti.