Qyzylordada qala ákimi qabyldaýyna kelgen áıeldi uryp-soǵý deregi rastalǵan joq
QYZYLORDA. QazAqparat - Áleýmettik jelide jarııalanǵan Qyzylordada áıeldi uryp-soǵý deregi rastalǵan joq. Onda Qyzylorda qalasy ákiminiń qabyldaýy kezinde quqyq qorǵaý organdary tarapynan bir azamatshaǵa qysym kórsetilgeni týraly aıtylǵan edi, dep habarlaıdy QazAqparat tilshisi.
Bul týraly Óńirlik kommýnıkatsııalar qyzmetinde ótken brıfıngte Qyzylorda oblysy Polıtsııa departamentiniń bastyǵy Qaırat Muhıtov málimdedi.
Ol jazbany 2019 jyldyń naýryzynyń 4-nen 5-ne qaraǵan túni Almaty qalasynyń turǵyny Qural Seıithanuly facebook áleýmettik jelisinde jarııalaǵan edi. Onda Qyzylorda qalasy ákiminiń qabyldaýy kezinde quqyq qorǵaý organdary tarapynan bir azamatshaǵa qysym kórsetilgeni týraly sol azamatshanyń shaǵymy negizinde jazba qaldyrǵan.
Atalǵan derek boıynsha Qyzylorda oblystyq polıtsııa departamenti, Jergilikti polıtsııa qyzmeti jáne oblys ákimdigi basshylary jýrnalıstermen júzdesti.
«Bul aqparat túnde jarııalandy. Oǵan baılanysty departamenttiń baspasóz qyzmeti áleýmettik jelilerde aqparatqa baılanysty tekserý jumystary bastalǵandyǵy týraly jazba qaldyryp, jaýap berdi. Tekserýdiń nátıjesinde atalmysh derek rastalǵan joq, - dedi Qyzylorda oblystyq Polıtsııa departamentiniń bastyǵy Qaırat Muhıtov.
Departament bastyǵy Qaırat Muhıtov QR Qylmystyq kodekstiń 274-baby boıynsha jalǵan aqparat taratqan azamattar qylmystyq jaýapkershilikke tartylatynyn atap ótti. Sondaı-aq, departament bastyǵy oblystyq polıtsııanyń árdaıym ashyq dıalogqa jáne turǵyndardy der kezinde aqparattandyrýǵa daıyn ekenin atap ótti.
«Qyzylorda oblysy ákiminiń tapsyrmasyna sáıkes 9 aqpannan bastap jergilikti turǵyndardy jeke qabyldaý sharalary jasalyp keledi. Onda tıisti sala basshylary turǵyndardyń ótinishin tyńdap, onyń sheshilý joldaryn qarastyrdy», - dedi Qyzylorda oblystyq apparat basshysynyń orynbasary Serik Shotaev.
