Qyzylordada IT-park jastardyń startap-jobalaryn ázirleıdi
QYZYLORDA. QazAqparat - Qyzylorda oblysynda Elbasy Joldaýy júktegen mindetter júzege asyrylyp jatyr. Sonyń bir úlgisi bıyl ashylǵan óńirlik IT-park jastardyń startap-jobalaryn ázirleıtin ortalyǵyna aınalyp otyr. Oǵan qosa jastar sol jobalardy júzege asyrý baǵytynda ınvestorlar tarta alady, dep habarlaıdy QazAqparat tilshisi.
Sońǵy jyldary Syr óńirinde jańa zaman talabyna saı jobalardy júzege asyrýǵa erekshe nazar aýdarylyp keledi. IT-park sondaı ıgi istiń biri bolyp tabylady. Oblysta jańa tehnologııalardyń syryn túsine biletin jastar qatary kóbeıip keledi. Olarǵa qoldaý kórsetý baǵytynda IT-park jumysy qolǵa alynyp otyr.
Ústimizdegi jyldyń qańtar aıynda oblys ákimi Qyrymbek Kósherbaev Reseıdiń Tatarstan Respýblıkasynyń astanasy - Qazan qalasyndaǵy IT-park qyzmetimen tanysyp qaıtqan edi. Kelesi kezekte mundaı jobany Syr óńirinde júzege asyrý múmkindikteri zertteldi. Osynyń nátıjesinde atalmysh IT-park jumysy bastalyp ketti.
Oblys ákimi apparat basshysynyń aqparattyq tehnologııalardy damytý jónindegi orynbasary Indıra Aqjigitovanyń aıtýynsha, atalmysh parkti qurý talantty jastardy qoldaýǵa baǵyttalǵan. Ol elimizdi tsıfrlandyrý jónindegi baǵdarlama aıasynda júzege asyryla bastady.
«IT-park arqyly jastar ınnovatsııalyq jobalardy júzege asyra alady. Oǵan qosa túrli laborotorııalyq sımýlıator, 2D, 3D grafıkalyq jobalardy ázirleýge nazar aýdarylady. Atalmysh jobalardy ázirleý men óndiristegi qoldanysyn testileýge, aqparattyq-baǵdarlamalyq ónimder jasap shyǵarýǵa, óndiris jáne oblys damýynyń salalaryn avtomattandyrýǵa jáne olarǵa qyzmet kórsetýge qolaıly jaǵdaı jasalady», - dedi I.Aqjigitova.
ІT-park qyzmetiniń maqsaty - talantty jastardyń aqparattyq-kommýnıkatsııalyq tehnologııalar salasyndaǵy startap jobalaryn qoldaý men damytý, tehnıkalyq-laboratorııalyq sheberhanalarda túrli robotehnıkalyq prototıpterdiń óndiristik jobalaryn ázirleý men testileý, túrli laboratorııalyq sımýlıator, kontroller men vıdeopanelderde 2D, 3D grafıkalyq jobalardan VR/AR tehnologııalar boıynsha bastamalardy ázirleý men óndiristegi qoldanysyn testileý. Sondaı-aq, bul oryn ІT jobalardyń damýy men tehnologııalyq tıimdiligin arttyrý boıynsha kovorkıng ortalyǵy qyzmetin iske qosý, túrli baǵdarlamalyq oqý kýrstaryn ІT akademııalyq oqý ortalyǵynyń bazasynda iske qosý, aqparattyq-baǵdarlamalyq ónimder jasap shyǵarýǵa, óndiris jáne oblys damýynyń salalaryn avtomattandyrýǵa jáne olarǵa qyzmet kórsetýge baǵyttalǵan.
Ótken jyldyń jeltoqsan aıynda «HackDay» ıdeıalar festıvali bolyp ótti. Ony Qyzylorda oblysynyń ákimdigi uıymdastyrdy. Atap keterligi, ol - Syr óńirinde jobalyq basqarý aıasynda ótkizilip jatqan alǵashqy shara. Munda 24 saǵat ishinde qatysýshylar jańa ıdeıalarymen bólisti. Basty maqsat - eń qyzyqty jobany qurý, jańa tájirıbe men basty júldeni jeńý. Ideıalar festıvaline qatysý arqyly qýatty shyǵarmashylyq ortada topty jınaý, sonymen qatar qyzyqty jobalardy usyný, ony júzege asyrýǵa mán berildi. Oǵan 500-ge jýyq jas azamattar qatysty. Osynyń nátıjesinde aqparattyq tehnologııalar, kıno jáne vıdeo, kontent jáne medıa sektsııa boıynsha óz biliktiligin arttyra bildi.
Festıval barysynda kóptegen jobalar mamandardyń kóńiline shyqty. Máselen, oǵan qatysqan jas óren úıden gaz ıisi shyqsa, birden uıaly telefonǵa habarlama túsetin gaz analızatoryn oılap tapty. Bul qaýiptiń aldyn alýǵa múmkindik beredi. Sondaı-aq, taǵy bir qatysýshy múkindigi shekteýli jandarǵa taptyrmas qurylǵy bolyp tabylatyn smart-palata jobasyn usyndy. Smartfonǵa qondyrylǵan basqarý júıesi arqyly naýqastyń aýrýyn anyqtaýǵa bolady. 
Keıingi kezeńde Syr óńirinde jastardy jańa tehnologııalarǵa tartý baǵytynda nátıjeli ister atqarylyp keledi. Oblys ákiminiń bilim berý granty boıynsha kóptegen jastar elimizdiń jetekshi joǵary oqý oryndarynda bilim alýǵa múmkindik týdy. Bilim grantynyń 70 paıyzǵa jýyǵy IT mamandyqtaryna bólinip otyr.
Búgingi tańda óńirlik IT-park jergilikti jastardyń jańashyl jobalardy júzege asyratyn ortalyǵyna aınaldy. Ol aldaǵy ýaqytta kóptegen tyń ıdeıalardyń negizin qalaıtyn bolady.
Aıta keteıik, Qyzylorda oblysynda bıyl tsıfrlyq tehnologııa basqarmasy quryldy. Sondaı-aq, Qyzylordada tsıfrlyq tehnologııa baǵytyndaǵy jobalar qatary kóbeıdi.
