Qyzylordada Іsker áıelder keńesi 200 adamdy oqytty
QYZYLORDA. QazAqparat - Qyzylordada Kásipkerler palatasy janyndaǵy Іsker áıelder keńesi «Áıelderge arnalǵan kásipkerlik aptalyǵynda» 200-den astam qyz-kelinshekti tegin oqytty.
Bul týraly Іsker áıelder keńesiniń tóraıymy Janna Amanova málim etti, dep habarlady QazAqparat HAA tilshisi.
«Qyz-kelinshekterge arnalǵan arnaıy aptalyq uıymdastyrýyma aımaqtaǵy názik jandylardyń suranysy sebep boldy. Alǵash keńes jumysyn qolǵa alǵanda óz kásibin ashqysy keletin jandardy kórdim, biraq basym bóliginde qorqynysh bar. Neden bastaý kerektigin, qaıda barý qajettigin bile bermeıdi», - degen Keńes tóraıymy bıyl tyń bastamany qolǵa alyp, arnaıy aptalyq uıymdastyrdy. Aptalyq dep atalsa da bir aı kóleminde ótkizilgen sharaǵa qyzylordalyq qyz-kelinshekter belsene qatysty.
«Aımaqta kásippen aınalysatyn názik jandylar qataryn kóbeıtýǵa belsendi atsalysyp, aptalyqtyń oqytý kýrstarynda tegin master-klastar ótkizgen oblystyq isker áıelder keńesiniń múshelerine alǵysymdy aıtqym keledi. Aptalyq 1-30 naýryz aralyǵynda ótti. Qorytyndy sharany Іsker áıelder keńesiniń 2 jyldyǵy aıasynda qaladaǵy «Dostyq» úıinde ótkizdik. Bul shara odan ári kásippen aınalysýǵa daıyn, ıkemi bar qyz-kelinshekterdiń tizilimin qalyptastyrýǵa sep boldy. Endi alda «Qyz-kelinshekter bıznesi» atty oqytý jobasyn qolǵa alyp jatyrmyn», - dedi Janna Amanova.
«Qyz-kelinshekter bıznesi» jobasy aıasynda osy jyldyń mamyr-tamyz aılary aralyǵynda bıznes-tálimgerler tegin oqytý trenıngterin ótkizetin bolady. Shara demalys kúnderi saǵat 15.00-den 18.00 aralyǵynda ótedi.
Janna Amanovanyń aıtýynsha, «Qyz-kelinshekter bıznesi» jobasyna naýryz aıynda ótken aptalyq barysynda túsken 180 ótinishtiń ishinen 100 saýalnama ıesi tańdalyp alyndy. Búginde soǵan saı toptar qurylyp, tálimgerler anyqtaldy. Kásibin júrgizgen azamatshalarǵa Kásipkerler palatasy tarapynan da tegin servıstik jáne ózge de qyzmetter kórsetiletin bolady. «Qyz-kelinshekter bıznesi» jobasy 6 mamyr men tamyzdyń sońyna deıin ótedi. Apta saıyn uıymdastyrylatyn trenıngterde qatysýshylar bıznes salasynda jetistikke jetken Raýshan Bazarbaı, Mádına Tólepova, Qanat Qojabergenov, Ásııa Qyrbaeva, Aqmaral Baımahanova, Natalıa Mıshýkova syndy óz isiniń úzdikterinen dáris alatyn bolady», - deıdi ol.
