Qyzylordada iri kólemde gaz urlyǵy anyqtaldy
QYZYLORDA. QazAqparat- Qyzylordanyń kommýnaldyq-turmystyq nysandaryn tekserý barysynda saýda úılerdiń birinde qabyrǵanyń ishine jasyryp tartylǵan gaz qubyry anyqtaldy.
Osylaısha, «Ótemuratov S.» jeke kásipkerligi tabıǵı otyndy urlap kelgen.
«QazTransGaz Aımaq» AQ qyzmetkerleri eki «Premıým-50» gaz qazandyǵynyń gaz júıesine zańsyz qosylǵanyn, sonyń saldarynan 100 myń tekshe metr kógildir otynnyń zańsyz jaǵylyp, 2 mıllıon teńge kóleminde shyǵyn kelgenin anyqtady. Olar ishki ister departamenti qyzmetkerlerimen birlese otyryp, iske baılanysty hattamalar toltyryp, foto jáne beıne jazbalar túsirdi.
Endi olar Qazaqstan Respýlıkasy zańnamasyna saı jaýap berip, aıyppuldar tóleıtin bolady.
Aıta keteıik, dál osyndaı jaǵdaı Qyzylordada birneshe aı buryn anyqtalyp, úlken shý týǵyzǵan bolatyn. Ol kezde qalanyń ortasynda ornalasqan «Karavan saraı» qonaq úıler kesheniniń ıesi gaz eseptegishtegi plombany buzyp kórsetkishti tómendetken. Zańdy túrde salynǵan aıyppuldarǵa qaramastan keshen ıesi bárin joqqa shyǵaryp, «QazTransGaz Aımaq» AQ qyzmetkerlerine qoqan-loqy da jasaǵan edi.
Ótken jyly Qyzylorda qalasynda gaz paıdalanýdaǵy zań buzýshylyqqa jol bergen oqıǵalardyń 86 faktisi anyqtaldy.
