Qyzylordada ırandyq kúrish sorty egiledi
QYZYLORDA. QazAqparat - Syr óńirinde ırandyq kúrish sorttary synaqtan ótkizilip jatyr, dep habarlaıdy QazAqparat tilshisi.
Budan buryn jergilikti dıqandar «Torem Hoshemı» surpyn synaqtan ótkizgen edi. Ol jergilikti jerdiń topyraǵy men klımatyna sáıkes keletinin kórsetti. Ústimizdegi jyly Qarmaqshy aýdany Aqtóbe aýylyndaǵy «Aqtóbe jáne K» JShS bıyl 500 gektarǵa ırandyq «Torem Hoshemı» surpyn egýdi qolǵa aldy. Seriktestik dıqandar kúrishtiń bul sortyn byltyrdan bastap synaqtan ótkizdi. Alǵashqyda bar-joǵy 2 gektarǵa egilgen suryp byltyr 70 gektarǵa artqan. Ónimdi Iran eline eksporttaýǵa jol ashyldy.
«Bıyl «Torem Hoshemı» surpyn úshinshi jyl zerttep jatyrmyz. Barlyǵy suranystaǵy sorttar. Tıimdi bolsa, kóbeıtemiz. Tarom-hoshemı óz tıimdiligin dáleldedi», - dedi Y.Jaqaev atyndaǵy Qazaq kúrish ǵylymı-zertteý ınstıtýtynyń dırektory Serikbaı Ómirzaqov.
Sondaı-aq, atalmysh suryp tárizdi ırandyq kúrishtiń tórt sorty zerttelýde. Tıimdiligi anyqtalǵan jaǵdaıda aımaqtaǵy sharýashylyqtar onyń ónimdiligine mán beredi.
Mamandardyń aıtýynsha, Iranda kúrishtiń baǵasy bizdikinen 10 esedeı qymbat. Iran eli jylyna 3 mıllıon tonna aq kúrishti syrttan satyp alady. Sonyń 1 mıllıon tonnasyn qyzylordalyq dıqandardyń daıyndap berýge múmkindigi bar.
