Qyzylordada Iran-Ǵaıyptyń 70 jasqa tolýyna arnalǵan kesh ótti
M.Mámetova atyndaǵy gýmanıtarlyq kolledj qyzmetkerleri birlese otyryp QR Memlekettik syılyǵynyń laýreaty, «Parasat» ordeniniń ıegeri, QR-nyń Eńbek sińirgen qaıratkeri, «Tarlan» syılyǵynyń laýreaty, aqyn-dramatýrg Iran -Ǵaıyptyń 70 jyldyǵyna arnalǵan «Jan jumbaǵyn jarııa etken qudiret» atty shyǵarmashylyq keshin ótkizdi, dep habarlady QazAqparat tilshisi.
Syr perzenti óziniń týyndylaryna jaratylystyń uly fenomeni - adamdy basty nysana ete otyryp, onyń búkil bolmysyndaǵy kúıinishi men súıinishin, qýanyshy men muńyn ózine ǵana tán sezimtaldyqpen jetkize bilgen. Alǵashqy «Júrek jyrlaıdy» atty jınaǵy 1974 jyly jaryq kórdi. 1990 jyly úsh tomdyq, al 2006 jyly 13 tomdyq tańdamaly jyr jınaqtary jaryq kórdi. 2002 jyly «Qorqyttyń kóri» atty jyr kitaby úshin QR Memlekettik syılyǵynyń laýreaty atandy. Táýelsiz Qazaqstan Respýblıkasynyń tuńǵysh ótken jazba aqyndar jyr-músháırasynyń bas júldegeri.
Iran-Ǵaıyp ónerdegi tazalyqty, aqıqatty qalaıtyn aqyn. Ózine qoıǵan talapty ózge de aqyndarda bolsa dep armandaıdy. Aqynnyń tynys-tirshiligi, arman-tilegi ár óleńinde kórinis tabady. Shara barysynda sóz alǵan qazaq tili pániniń oqytýshylary M.Meńdibaeva men B.Ahýnov Iran-Ǵaıyptyń poezııasynyń kórkemdik júıesinen taqyrybynyń ár alýandyǵy, izdenis murattary, óleń órisi men ondaǵy ómir ónegeleri, keńinen kórinis beretinin aıtty. Kolledj kitaphana meńgerýshisi Z.Pazylova óz sózinde aqynnyń adamı bolmysty beıneleýden, izgilikke qushtarlyqtan ómir, ýaqyt tynysyn sezdiretin shyǵarmalaryna toqtaldy. Aqynnyń shyǵarmashylyǵyna arnalǵan beınerolık kórsetildi.
Qatysýshy jastar Iran-Ǵaıyp shyǵarmalarynan «Qadyr men Tumanbaıǵa», «Táýelsizdik tolǵaýy», « Abaıǵa arnaý», «Aqyn aǵaǵa», « Kún tunshyqqan keýdemde» óleńderin oqydy. Sharaǵa qatysýshylar aqynnyń sózine jazylǵan «Aman bol» ánin hormen oryndady. Kesh sońynda olar «Jan jumbaǵyn jarııa etken qudiret» atty kitap kórmesimen tanysty.
