Qyzylordada «IQ-ORDA» respýblıkalyq ıntellektýaldyq baıqaýy ótti
Qyzylorda oblystyq qoǵamdyq damý basqarmasyna qarasty Jastar resýrstyq ortalyǵynyń uıymdastyrýymen ótken ıntellektýaldyq saıysqa respýblıkamyzdyń túkpir-túkpirinen 18-35 jas aralyǵyndaǵy jastar qatysty.
«Ózderińiz bilesizder, memleket jastardyń bilim-biligin kóterý, baǵyt-baǵdar berý men jańa bastamalarǵa qoldaý bildirýdi árkez nazardan qalys qaldyrǵan emes. Úkimetke, jergilikti atqarý organdaryna udaıy tıisti tapsyrmalar berilip, jastar saıasatyn júrgizýge turaqty kóńil bólip keledi. XXI ǵasyr bilimniń, ıntellektýaldy adam kapıtalynyń zamany. Jastarǵa qaı zamanda da kóp úmit artylǵan, artyla da bermek. Elimizdiń barlyq ıntellektýal, erýdıt jastaryna búgingi saıysta sáttilik tileımin», - dedi sharany ashyp bergen oblys ákiminiń orynbasary Nurymbet Saqtaǵanov.
Saıysta Atyraý, Aqtóbe, Jetisý, Shyǵys Qazaqstan oblystarynan, Almaty men Qyzylorda qalasynan jáne óńirdiń barlyq aýdandarynan kelgen úzdik 20 komanda ózara synǵa tústi. Bes kezeńnen turatyn saıysta komandalar qazaq jáne álem ádebıeti, Táýelsiz Qazaqstan tarıhy, logıkalyq, kıno jáne mýzyka taqyryptary boıynsha arnaıy daıyndalǵan suraqtarǵa jaýap berdi.
Saıys qorytyndysymen, júldeli I oryndy Qazaly aýdanynan kelgen «Qazaly» komandasy (500 000 tg), II oryndy Jalaǵash aýdanynyń «J-Team» komandasy (300 000 tg), III oryndy Almaty qalasynan kelgen «Ál-Farabı» komanday (200 000 tg) ıelendi. Arnaıy nomınatsııalar (50 000 tg) «Beıbarys sultan urpaqtary» (Atyraý oblysy), «Namysty eldiń urpaqtarymyz» (Aqtóbe oblysy), «7SU TEAM» (Jetisý oblysy), «Alash Orda» (Shyǵys Qazaqstan oblystary) jáne Qarmaqshy aýdanynyń «Qadam» komandasy men Qyzylorda qalasynyń №235 mektep quramasy «Kómekbaı jastary» komandasyna buıyrdy.
Bilimdi, izdenimpaz, kommýnıkatıvti jáne tapqyr tulǵalardy daralaıtyn joba ar aımaqtyń ıntellektýal jastaryn toǵystyrǵan biregeı joba boldy.
