Qyzylordada ınternet arqyly alaıaqtyq jasaıtyndar kóbeıdi

QYZYLORDA. QazAqparat - Qyzylorda oblysynda aqparattyq tehnologııany paıdalanyp alaıaqtyq jasaǵandar kóbeıip barady. Jyl basynan beri mundaı 93 derek tirkeldi, dep habarlaıdy QazAqparat tilshisi.

«Onyń 12-si boıynsha qylmystyq ister aıyptaý aktisimen sotqa joldandy. Al beseýi taraptardyń ózara ymyralasýyna baılanysty toqtatyldy. Qalǵandary boıynsha sotqa deıingi tergep-tekserý júrgizilýde», - dep málim etti Qyzylorda oblystyq polıtsııa departamentiniń baspasóz qyzmeti.

Vedomstvonyń málimetinshe, quqyq buzýshylar ǵalamtor jelisindegi ınternet-dúken qyzmetin paıdalanatyn turǵyndardy aldaıdy. Olardyń qarajatyn jymqyryp, bas paıdasyna jaratady. Aldaý jolymen jábirlenýshilerdiń jeke kýálik nómirin, depozıt esep-shottarynyń jáne bankomat kartochkasynyń nómirin alady. Osy derekterdi uıaly telefonmen ǵalamtor jelisi arqyly nesıe berýshi kompanııalarǵa jiberip, nesıe rásimdeıdi. Al aqshany ózderi ashqan esep-shottarǵa aýdartyp, bas paıdasyna jaratady.

«Turǵyndardan alaıaqtardyń qurbanyna aınalmas úshin saqtyq sharalaryna muqııat bolýy suraımyz. Qarapaıym ǵana uqyptylyqty ustaný kerektigin eskertemiz. Sonymen qatar, alaıaqtyq deregi oryn alǵan jaǵdaıda tez arada polıtsııaǵa habarlasýy tıis», - dedi departament mamandary.