Qyzylordada Ilıa Ilın «Biz birgemiz» aktsııasyna qatysty

QYZYLORDA. QazAqparat - Qyzylordada sport jáne óner salasyndaǵy belgili azamattar turmysy tómen otbasylardy qoldaýǵa baǵyttalǵan «Biz birgemiz» aktsııasyna úles qosty. Olardyń qatarynda belgili aýyr atlet Ilıa Ilın de bar, dep habarlaıdy QazAqparat tilshisi.

Ilıa Ilınmen birge bokstan álem chempıonatynyń qos dúrkin kúmis júldegeri Qamshybek Qońqabaev pen balýan Maqsat Isaǵabylov ta bar.

«Arnaıy aktsııa barysynda jerlesterime qoldaý kórsetýge tyrystym. Mundaı sátterde bir-birimizge demeý jaasýymyz tıis. Ol - árbirimizdiń azamattyq mindetimiz. Sondyqtan ıgilikti sharaǵa qoldaý kórsetýdi durys sanadym», - dedi tórt dúrkin álem chempıony.

Osyndaı lebizin Qamshybek Qońqabaev ta bildirdi. Ol qıyndyqtyń barlyǵy artta qalatynyn, aldaǵy kúnderde úlken jetistikterge negiz qalaıtynyn jetkizdi.

Belgili aıtysker-aqyn, eki márte «Altyn dombyra» ıegeri Muhtar Nııazov ta mundaı ıgilikti iske belsendi qatysty. Ol oblysqa tanymal «Abaı-Dáýlet» JShS qoldaýymen Jalaǵash aýdanyndaǵy aýdan ortalyǵy, Daldabaı, Alamesek jáne basqa da eldi mekenderdegi 100 otbasyna azyq-túlik kómegin kórsetti.

Syr óńirinde kásipker jáne metsenat azamattar turmysy tómen otbasylarǵa qol ushyn sozyp otyr. Nátıjesinde olardyń tarapynan 7800 otbasyǵa azyq-túlik jetkizildi. Sondaı-aq, arnaıy qurylǵan qoǵamdyq qorǵa 80 mln teńgeden astam qarjy quıyldy.