Qyzylordada HІІI jastar forýmy ótti

Jastar kóshbasshylary jáne elimizdiń ózge óńirleriniń belsendileri qatysqan Forýmnyń plenarlyq otyrysynda oblys ákimi Qyrymbek Kósherbaev jastardy qoldaýǵa baılanysty atqarylyp jatqan jumystar jaıynda aıtty.

«Óńirde memlekettik jastar saıasatyn damytýǵa baǵyttalǵan «Jol kartasy» men keshendi josparlar qabyldanyp, 60-tan astam áleýmettik jobalar iske asyrylýda. Qyzylorda oblysy  - respýblıka boıynsha jastar saıasatyna qarjy bólýden birinshi orynda.

«Ústimizdegi jyly oblystaǵy 6000 mektep túleginiń 97% joǵary jáne orta arnaýly oqý oryndaryna tústi. Biz úshin 97% - bul bilim salasynyń jetistigi, balalarymyzdyń jarqyn bolashaǵy ǵana emes, olardyń margınal jastar qataryn tolyqtyrmaıtynyna, ómirde óz ornyn tabatynyna degen senimdilik", - dedi aımaq basshysy Qyrymbek Kósherbaev. 

Sonymen qatar, plenarlyq otyrysta saıasatker Aıdos Sarym, Halyqaralyq aqparattyq tehnologııa ýnıversıtetiniń prorektory Raıs Óskenbaeva jáne "Innovatsııalyq tehnologııa parki" avtonomdy-klaster qorynyń basqarýshy dırektory Áljan Birálıev qatysyp, óz pikirlerin aıtty.

Forým aıasynda "HHІ jańa shaqyrtýlary" jáne "Qoǵamdyq oı-sanany jańǵyrtý" sektsııa otyrystaryna spıker retinde oblystaǵy jańa tehnologııa jáne áleýmettik salanyń sarapshylary qatysty. Sondaı-aq, Forým delegattary aımaqtyń Jastar resýrstyq ortalyǵyn kórip, jumysymen tanysty.

Atap ótý kerek, oblystyq Jastar resýrstyq ortalyǵy jobalyq basqarý júıesimen jumys isteıdi. Jyl basynan beri memlekettik shyǵynsyz 12 baǵyt boıynsha jobalar júzege asýda.

Jastar ortalyǵynyń ǵımaratyna kúrdeli jóndeý jumystary júrgizilgen, onda kovorkıng-ortalyq, psıholog kabıneti, túrli sport sektsııalary ashylǵan. Sonymen qatar, ortalyqta aǵylshyn tili, kompıýter jáne quqyqtyq saýattylyq, beınetaspager kýrstary bar. Búginde 300-den astam jas qosymsha daıarlyq kýrsyn bitirdi. 

Keler jyly Syrdarııanyń sol jaǵalaýynan "Jastarǵa qyzmet kórsetý ortalyǵy" paıdalanýǵa beriledi.

Forým aıasynda N.Bekejanov atyndaǵy oblystyq drama teatrynda Qazaqstannyń 7 óńirinen kelgen komandalardyń qatysýymen oblys ákiminiń kýbogyna arnalǵan respýblıkalyq "Jaıdarman" oıyny ótti. Qyzylorda oıynshylary alǵashqy úshtikke endi ("Qyzylorda" komandasy, 3 oryn), Aqtóbe ("Femıda", 2 oryn) jáne Batys Qazaqstan ("Grant", Oral q., 1 oryn). 

Aıta ketý kerek, 2013 jyly oblysta daryndy jastar men turmysy tómen, kóp balaly otbasylarynyń balalaryna aımaq basshysynyń arnaıy bilim granttary berilip keledi. Búginde ony 694 túlek ıelendi. Sonymen qatar, "Serpin" baǵdarlamasy boıynsha  4 myń qyzylordalyq jas bilim alýda.

Erekshe atap ótetindigi, oblystyń 452 mektep túlegi Reseı Úkimetiniń jetekshi tehnıkalyq oqý oryndarynyń granttaryna qol jetkizdi. Keler jyly 76 jas  oqýyn bitiredi. Olardyń jumysqa ornalastyrý boıynsha másele týyndamaıdy.