Qyzylordada haıýanattar baǵy ashyldy

Qazir munda qustar men jan-janýardyń birneshe túri bar. Haıýanattar baǵynda ózge qurlyqtan jetkizilgen ań-qus joq. Negizinen jergilikti tabıǵatqa beıimdelgender. Munda kelýshiler aldymen alyp búrkitti qyzyǵa tamashalaıdy. Kishkentaı balalar qustyń osy túrine zor qyzyǵýshylyq bildirip jatady.

«Búrkit aınalasyna saqtyqpen qaraıdy. Degenmen qımyl-qozǵalysy óte shapshań. Balalardyń tor arasyna laqtyrǵan jemtigine muqııat qaraıdy. Sondaı óte saq», - deıdi haıýanattar baǵynyń qyzmetkeri Azamat Myrzabekov.

Sondaı-aq, bul jerden appaq úı qoıandaryn da taba alasyz. Taýyqtyń balapandary da balalarǵa óte qyzyq. Áınek qorshaýda turǵan sary jylanǵa da kelýshiler tańdana qaraıdy. Tór jaqtaǵy qorshaýda eki taýys ornalasqan.

Ashylǵanyna kóp ýaqyt bola qoımasa da, bul jerge kelýshiler qatary kún sanap artyp keledi. Ata-analar balalarymen munda jıi keledi. Qazir bul jerde atalǵan haıýanattardan bólek totyqus, tasbaqa, laq, terisi baǵaly tyshqan tuqymdas - shınshalla bar. Olardyń kútimi de ońaı emes. Árbiriniń óz babyn jasaý qajet. Haıýanattardy arpa, bıdaı, kúnjara, júgeri syndy qarapaıym taǵamdarmen azyqtandyrady.

«Aldaǵy ýaqytta haıýanattar qataryn kóbeıtýge kóńil bólsek dep otyrmyz. Árıne, olardyń barlyǵy aldaǵy kúnderde júzege asatyn bolady. Basty maqsatymyz - haıýanattar baǵy jumysyn óz deńgeıinde atqaryp, atqarylatyn jumystardy júıeleý. Bul baǵytta tájirıbeni molaıta túsý oıda bar. Sol maqsatta ózge qalalardaǵy tıisti mamandarmen áriptestik baılanys ornatýǵa mán beremiz», - deıdi A.Myrzabekov.

Aıta keterligi, haıýanattar baǵyn jergilikti kásipkerlerdiń biri óz qarjysyna ashqan. Mundaı is Syr óńirinde tuńǵysh márte qolǵa alynyp otyr.

«Árıne, bul iri haıýanattar baqtarymen salystyrýǵa kelmeıtin shyǵar. Alaıda, jas urpaqty tabıǵatpen etene tárbıeleýge bul orynnyń óz paıdasy tıedi degen oıdamyn», - deıdi qalalyq mádenı-demalys parkiniń dırektory Ánýar Naqyp.

Ádiljan Úmbet