Qyzylordada halyqtyń sporttyq nysandarǵa qoljetimdiligin artyp keledi
QYZYLORDA. QazAqparat - Syr óńirinde halyqtyń sporttyq nysandarǵa qoljetimdiligin arttyrý baǵytynda nátıjeli jumystar atqarylyp keledi. Bul baǵytta kóptegen jobalar qolǵa alynǵan, dep habarlaıdy QazAqparat tilshisi.
Tuńǵysh Prezıdent - Elbasy Nursultan Nazarbaevtyń 2008 jylǵy 5 qazanday Qazaqstan halqyna Joldaýynda «Óńirlik deńgeıdegi rezervterdi taýyp, buqaralyq sport pen dene shynyqtyrýdyń qoljetimdiligin arttyrý qajet» dep atap kórsetken bolatyn.
Búginde Qyzylorda oblysynda sportpen júıeli túrde shuǵyldanýshylar qatary artyp keledi. Óńirde 231 myńnan astam adam salaýatty ómir saltyn ustanady. Bul ótken jyldarmen salystyrǵanda kórsetkishterden joǵary.
Syr óńirinde balalar-jasóspirimder sport mektepteri, sport klýbtarynda dene shynyqtyrý jáne sportpen shuǵyldanatyn 7-18 jas aralyǵyndaǵy balalar men jasóspirimder sany da ósken. Kórsetkish 23 myńnan astam adamǵa jetken.
Syr sportshylary kóptegen jarystarda tolaǵaı tabystarǵa kenelip keledi. 2019 jyldyń 6 aıynda sportshylar QR chempıonattarynda 907 medal jeńip alǵan. Onyń ishinde 272-i altyn, 248-i kúmis, 387-i qola. Qyzylordalyq jastar álem jáne Azııa chempıonattarynda 48 medal alyp qaıtty.
«Halyqtyń sporttyq nysandarǵa qoljetimdiligin arttyrý maqsatynda tıisti is-sharalar qolǵa alynyp otyr. Bul baǵytta balalar men jasóspirimder sport mektepteri jelisin ulǵaıtý jáne shuǵyldanýshylar sanyn arttyrý isine mán berilip keledi. Osy maqsatta memlekettik-jekeshelik áriptestik aıasynda bıyl 21 jobany júzege asyrý josparlanyp otyr. Byltyrǵy jyly sondaı 9 joba iske qosyldy», - dedi Qyzylorda oblystyq Dene shynyqtyrý jáne sport basqarmasynyń basshysy Oljas Ákimov.
Basqarma basshysy oblys sportshylaryn 2020 jyly Tokıo qalasynda ótetin Olımpıada oıyndaryna joldama alýyna múmkindik týǵyzýǵa basa nazar aýdarylyp otyr. Sondaı-aq, álem, Azııa jáne Qazaqstan Respýblıkasynyń chempıonattaryna sportshylardyń daıyndyǵy men qatysýyn qamtamasyz etý baǵytynda da nátıjeli jumystar júrgiziledi.
Aldaǵy ýaqytta Qyzylorda qalasyndaǵy «Lokomotıv» stadıonyna kúrdeli jóndeý jumystary bastalady. Oǵan qosa «Nursát» tennıs ortalyǵynyń 4 jabyq tennıs kortynyń qurylysy aıaqtalady.
