Qyzylordada Halyqaralyq áıelder merekesine arnalǵan jıyn ótti
QYZYLORDA. QazAqparat- A.Toqmaǵambetov atyndaǵy mádenıet úıinde 8 naýryz - Halyqaralyq áıelder merekesine arnalǵan saltanatty jıyn ótti. Merekelik sharada oblys ákimi Qyrymbek Kósherbaev meıirim men aıaly alaqan ıelerin quttyqtady, dep habarlady QazAqparat HAA tilshisi.
- Qasıetti Jer-Ana býsanyp, qar astynan alǵashqy báısheshekter boı jazatyn, jer-dúnıe meıirlene túsip, kún shýaǵymen araılanatyn kóktemniń ásem merekesi 8 naýryz - Halyqaralyq áıelder kúni qutty bolsyn! Shyndyǵynda, adamzat balasy úshin Anadan qudiretti, anadan ardaqty, anadan aıaýly eshkim joq. Sondyqtan, álemdegi eń joǵary madaq ta, qurmet te arý-analarǵa arnalady. Bul mereke jaqyndaǵan saıyn er-azamattar aq jaýlyqty ájesine, aıaýly anasyna, súıgen jaryna, ardaqty apa-qaryndasyna, súıkimdi qyzyna, qadirli qurbysyna ne syılasam dep tereń oıǵa shomatyn kezeńi bastalady. Ystyq yqylasy aqtarylyp, izgi iltıpatyn aıamaı kórsetedi. Árıne, Sizder bir kún ǵana emes, máńgilik qurmetke laıyqtysyzdar! - dedi oblys ákimi.
Q. Kósherbaevtyń aıtýynsha, sońǵy jyldardaǵy statıstıkaǵa júginsek, búgingi tańda pedagogtardyń 73 paıyzy, dárigerler men medıtsına qyzmetkerleriniń 87 paıyzy áıelder. Barlyq bıýdjettik sala qyzmetkerleriniń 60 paıyzy qyz-kelinshekterdiń úlesinde. Oblys ekonomıkasynyń mańyzdy salasy shaǵyn jáne orta bızneste - 80 paıyz áıelder.
"Búgingi kezdesýge kópbalaly analar, aýyl eńbekkerleri, muǵalimder, dárigerler, bir sózben aıtqanda elimizdiń táýelsizdigin nyǵaıtýǵa bar kúsh-jigerin salyp eńbek etip júrgen qurmetti qyz-kelinshekter, aıaýly arýlar jınalyp otyr. Oblystaǵy barlyq jetistikterge sizderdiń árqaısylaryńyzdyń qosqan úlesterińiz zor",- dedi óńir basshysy.
Merekelik kesh odan ári Syr eli ónerpazdarynyń kontserttik baǵdarlamasymen jalǵasty.
