Qyzylordada gıdrotehnık Sabyr Arystanbaevtyń eskertkish bıýsti ashyldy
QYZYLORDA. QazAqparat - Qyzylordada Qazaqstannyń eńbek sińirgen ınjener-gıdrotehnıgi, Qyzylorda oblysynyń jáne Shıeli aýdanynyń qurmetti azamaty Sabyr Arystanbaevtyń eskertkish bıýsti ashyldy.
Bul týraly QazAqparat tilshisi habarlady.
Saltanatty ashylý rásimine oblys ákimi Qyrymbek Kósherbaev, Májilis depýtaty, Halyq qaharmany Baqytjan Ertaev, eńbek ardagerleri jáne S.Arystanbaevtyń áriptesteri qatysty.
Sabyr Shaımerdenuly ótken ǵasyrdyń 60-80 jj. ortasynda oblystyń 6 sýarmaly alqaptarynda ornalasqan (Túgisken, Jańaqorǵan-Shıeli, Qyzylorda sol jáne oń jaǵa, Qazaly oń jáne sol jaǵa) kólemi 220 myń gektarǵa deıin, sýarmaly jerlerdiń ınjenerlik júıege keltirilýine jáne kóptegen gıdrotehnıkalyq qurylystardyń salynýyna erekshe úles qosty.
«Injenerlik júıedegi sýarmaly jer - Qyzylorda oblysyn basqa aımaqtardan erekshelendiretin, keler urpaq úshin Syr óńiriniń qadirin eseleı túsetin mańyzdy qazyna. Sabyr Shaımerdenuly 20 jylǵa jýyq osy mekemeniń bastyǵy qyzmetin abyroımen atqardy jáne sol kezderde jıi kezdesetin sý tapshy jyldary az mólsherdiń ózinde egistik jerlerdi sýlandyrýdyń júıeli sý aınalymy tásilin engizip, nátıjeli eńbek etti. Eńbegi memleket tarapynan eskerilip, Qazaq QSR-niń eńbek sińirgen gıdrotehnıgi ataǵy berildi, QSR Joǵary keńesi Prezıdıýmynyń Qurmet gramotasymen, «Eńbek Qyzyl Tý», «Halyqtar Dostyǵy» ordenderimen marapattaldy», - dedi oblys ákimi.
Sondaı-aq, mekeme qyzmetkerlerin Májilis depýtaty, Halyq qaharmany Baqytjan Ertaev jáne eńbek ardageri Daırabaı Ysqaqov quttyqtady.
Sabyr Arystanbaevtyń bıýsti Qyzylorda sý toraby ákimshilik ǵımaratynyń aldynda ornalasqanyn atap ótken jón.
