Qyzylordada gıdroqondyrǵylar jumysynda tsıfrlyq tehnologııalar paıdalanylady
QYZYLORDA. QazAqparat - Qyzylorda oblysyndaǵy Syrdarııa ózeniniń sol jaǵalaýynda oryn tepken Shirkeıli kanaly boıyndaǵy gıdroqondyrǵylar tolyqtaı avtomattandyrylady. Bul is kanaldy qaıta jańǵyrtý sharalary negizinde júzege asatyn bolady, dep habarlaıdy QazAqparat tilshisi.
Mamandar bul jumys aımaqta kóktem aılarynda bolatyn sý tasqyny qaýpin seıiltýge múmkinik beretinin aıtady. Oǵan qosa jaz mezgilinde dıqandar sýdan eshbir tapshylyq kórmeıdi. Shirkeıli kanaly bastaýyn darııadan alady. Ol Qyzylorda qalasy men Syrdarııa, Jalaǵash, Qarmaqshy aýdandaryn boılaı ótedi. Atalmysh kanaldyń jalpy uzyndyǵy 132 shaqyrymdy quraıdy. Jergilikti dıqandar atalmysh gıdroqondyrǵynyń boıynda 52 myń gektar kúrish egip keledi. Bul aımaqta egiletin kúrishtiń jartysynan astamyn quraıdy. Degenmen oǵan 30-40 jyldan beri eshqandaı jóndeý jasalmaǵan. Sonyń saldarynan keıbir tospalar jaramsyz kúıge tústi. Olardyń keıbiri tesilip, sý ustap turý jaǵdaıy qıyndady.
Shirkeıli sý arnasyn jańǵyrtý eki kezeń boıynsha júzege asty. Bul maqsatta respýblıka qazynasynan 4 mlrd teńge qarjy bólingen. Osynyń nátıjesinde buryn túıtkildi bolyp kelgen kóptegen túıin sheshildi. Aldymen 62 shaqyrym kanal boıy tazalandy. Sonymen qatar, 4 tospa jóndeýden ótkizildi. Olardyń 200 tekshe metr sý ótkizýge qaýqary jetedi. Oǵan qosa 32 shaqyrymǵa sozylyp jatqan elektr jelisi men qosalqy stantsııa qaıta jańǵyrtýdan ótkizilgen.
«Avtomattandyrylǵan júıe arqyly bir sý tospasynan ekinshi aýdannyń kólemine qansha sý ketip jatqany anyqtalyp otyrady. Ony mamandar ekran arqyly baqylaı alady. Osyndaı jumystar júrgizilgennen keıin kóptegen oń nátıjege qol jetkizýge bolady. Atap aıtqanda, sý shyǵyny edáýir azaıady. Ony jan-jaqtyn baqylap otyrýǵa ábden bolady», - dedi «Qazsýshar» RMK óndiristik ýchaske basshysy Jorabek Nurymbetov.
Búgingi tańda ekinshi kezeńi bastaly. Endigi kezekte 5 iri sý tospasy men 42 shaqyrym kanal tazalanyp, el ıgiligine beriletin bolady. Mamandar bul kezeńde 40 shaqyrymǵa jýyq jaryq jelisi tartylyp, barlyq gıdroqondyrǵylar avtomatty túrge aýysatynyn aıtady. Atalmysh joba barysynda tsıfrly tehnologııany paıdalaný josparlanyp otyr.
Sondaı-aq, Qyzylorda oblysynda zamanaýı sý únemdeý tehnologııalaryn qoldaný máselesine nazar aýdaryla bastady.
Illıýstratsııalyq foto
