Qyzylordada gazdy negizsiz qymbattatqan kompanııaǵa 877 myń teńge aıyppul salyndy
ASTANA. QazAqparat - QR Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıtetiniń Qyzylorda oblysy boıynsha departamenti «Turangaz» jaýapkershiligi shekteýli seriktestiginiń 2015 jylǵy qyzmetine tańdaýly tekserý júrgizdi.
TMRjBQK baspasóz qyzmetiniń habarlaýynsha, tekserý barysynda suıytylǵan gazdy bólshek saýdalaý, avtokólikke gazdy bólshek saýdada ótkizýdiń shekti baǵalaryn kóterý faktileri anyqtalǵan. Kompanııanyń 9 tutynýshyǵa qatysty baǵany kóterýge jol bergeni anyqtaldy, nátıjesinde 36 286 teńge negizsiz kiris alynǵan.
«Tabıǵı monopolııalar jáne retteletin naryqtar týraly» Zańnyń 7-3-babynyń 4) tarmaqshasyna sáıkes retteletin naryq sýbektisi shekti baǵany negizsiz kóterý nátıjesinde alynǵan kiristi tikeleı tutynýshylarǵa qaıtarýǵa mindetti.
Budan basqa, atalmysh kompanııanyń 2015 jylǵy tekserýde TMRBQK Qyzylorda oblysy boıynsha departamentine ótkizý kólemderi, kiris deńgeıi jáne ótkiziletin taýarlardyń bosatylý baǵalary týraly shynaıy emes aqparat berý faktisi anyqtaldy.
«Turangaz» JShS-y shekti baǵany negizsiz kóterý nátıjesinde alynǵan kiristi qaıtarmaǵany jáne ýákiletti organǵa jalǵan aqparat bergeni úshin QR ÁQK 166-babynyń 1 jáne 4-bólikteri boıynsha ákimshilik jaýapkershilikke tartyldy.
«Turangaz» JShS-na 877 428 teńge ákimshilik aıyppul salyndy.
