Qyzylordada gazdan ajyratylǵan turǵyn úılerge kógildir otyn búgin beriledi
QYZYLORDA. QazAqparat-Tabıǵı gazdan ýaqytsha ajyratylǵan Qyzylorda qalasyndaǵy turǵyn úılerge búgin gaz beriledi. Bul týraly óńirlik kommýnıkatsııalar ortalyǵynda ótken brıfıngte sala basshylary málimdedi,-dep habarlady QazAqparat tilshisi.
Budan buryn habarlaǵanymyzdaı, keshe oblys ortalyǵyndaǵy AGRS-2 jelisinde apatty jaǵdaı tirkeldi. Osyǵan baılanysty quzyrly mekemeler der kezinde jergilikti turǵyndarǵa qaýipsizdik sharalaryn qatań saqtaý jóninde habarlama taratylǵan bolatyn.
«Aqshabulaq» kenishindegi «Krıstall menedjment» seriktestigine qarasty elektr stansasynyń tutyný kólemin azaıttyq. Qyzylorda jylý elektr ortalyǵyn jappaı rezervtik mazýtqa kóshirdik. Keshe keshke deıin AGRS-2 jelisine tıesili gaz retteýshi pýnktterdi AGRS-1 jelisine aýystyrdyq. Biraq KBI jáne Tasbóget shaǵyn aýdandaryndaǵy 5 gaz retteýshi pýnkt qosylmaı qaldy. Halyqtyń qaýipsizdigin qamtamasyz etý maqsatynda tún ishinde jumys júrgize almadyq. Búgin tań atysymen atalǵan shaǵyn aýdandardaǵy pýnktterdi iske qosyp, gaz bere bastadyq», - dedi oblystyq energetıka jáne turǵyn úı-kommýnaldyq sharýashylyq basqarmasynyń basshysy Medet Ýsaın.
Brıfıngte qala ákiminiń orynbasary Asylbek Shámenov, «QazTransGazAımaq» AQ Qyzylorda óndiristiń fılıaly dırektorynyń birinshi orynbasary Baýyrjan Sátmaǵanbetov balkondy qalpyna keltirý úshin úı turǵyndaryna kómek kórsetiletinin jetkizdi. Sala basshylary jalpy máseleniń búgin keshke deıin retteletinin aıtty.
