Qyzylordada «gaz qubyryndaǵy apatty jaǵdaı» joıyldy
QYZYLORDA. QazAqparat - Qyzylorda gaz qubyryndaǵy «apatty jaǵdaı joıyldy», - dep habarlady QazAqparat tilshisi oblystyq TJD silteme jasap.
Oqý-jattyǵýdy ótkizýdiń josparyna sáıkes, aǵymdaǵy jyldyń 10 qarashasynda «QazTransGaz Aımaq» AQ fılıalynyń dıspetcherinen Qyzylorda qalasy Qajymuqan kóshesi mekenjaıynda №5 gaz taratqysh beketine KAMAZ avtokóligi soǵyp, joǵarǵy qysymdy gaz júıesi zaqymdalyp, gazdyń aýa shyǵýy, oqıǵa ornynda órt shyqqany jáne 2331 abonent jáne 1 óndiristik kásiporyn, 31 jeke kásiporyndy gazben qamtamasyz etý toqtatylǵany jóninde aqparat tústi.
Biryńǵaı kezekshilik dıspetcherlik qyzmet basqarmasynyń jedel kezekshisi jedel áreket etetin qyzmetterdi qulaqtandyrdy.
Oqıǵa ornyn qoǵamdyq tártipti saqtaý tobynyń kúshteri qorshaýǵa alyp, tótenshe jaǵdaı aımaǵynda avtokólik qozǵalysy retteldi.
Órtke qarsy qyzmet avtokóliginde oryn alǵan órt oshaǵyn der kezinde sóndirip, qutqarý toby zardap shekken júrgizýshini tótenshe jaǵdaı aımaǵynan medıtsına qyzmetkerlerine jetkizdi.
Gaz júıesindegi avarııalyq-tehnıkalyq komandasy zaqymdalǵan joǵarǵy qysymdy gaz júıesin qalpyna keltirý jumystaryn júrgizdi. Nátıjesinde qala turǵyndaryn ýaqtyly gazben qamtamasyz etý júzege asyrylyp, oqý-jattyǵý oń sheshimin tapty.
Oqý-jattyǵýǵa 8 qurylym, 19 tehnıka, 96 adam qatysyp, oqý-jattyǵý barysynda avarııalyq-qutqarý qurylymdarynyń qys mezgilinde gaz júıesinde avarııa bolǵan jaǵdaıda birlesip áreket etýi mashyqtandyryldy.
