Qyzylordada gaz ballonynyń jarylýy: oqıǵanyń sebepteri anyqtaldy
Esterińizge sala ketelik, bul keleńsiz jaǵdaı 20 qarasha kúni 18.00 shamasynda bolǵan edi . Jergilikti «112» nómirine Qyzylordadaǵy «Báıterek» shaǵynaýdanynda órt shyqqandyǵy jóninde habarlama kelip túsken.
«Oqıǵa ornyna jedel jetken №4 órt sóndirý bóliminiń jaýyngerlik esebi jalpy aýdany 72 sharshy metr bolatyn turǵyn úıde gaz ballonyn durys paıdalanbaýynan gazdyń jylystaýy paıda bolǵany anyqtaldy. Jarylys saldarynan úı qulaǵan. Órtti sóndirý barysynda 27 jáne 50 lıtrlik gaz ballondary syrtqa shyǵaryldy. Sondaı-aq, úı ishinde bolǵan 2 adamdy qatty kúıik shalǵan. Olardy kórshileri jeńil kólikpen der kezinde aýrýhanaǵa jetkizgen.
Órt sóndirý qyzmetiniń jyldam is-qımylynyń nátıjesinde kórshiles ornalasqan úıge órttiń taralý qaýpi ýaqtyly toqtatyldy. Órt 19 saǵat 34 mınýtta oqshaýlanyp, 19 saǵat 43 mınýtta tolyǵymen sóndirildi», - dedi Qyzylorda oblysy tótenshe jaǵdaılar departamentiniń órt sóndirý jáne avarııalyq qutqarý qyzmetiniń baspasóz mamany Álııa Erejepova.