Qyzylordada gaz ballony jarylyp, eki adamdy kúıik shaldy
QYZYLORDA. QazAqparat - Qyzylorda oblysynyń Jańaqorǵan aýdanyna qarasty Qojakent eldi mekeninde gaz ballony jarylyp, eki adamdy kúıik shaldy, dep habarlaıdy QazAqparat tilshisi.
Oqıǵa 1 maýsymda keshki saǵat 20.30 shamasynda bolǵan. Úı aldyndaǵy ýaqytsha baspananyń kireberis bólmesinde 27 lıtrlik gaz ballony jarylǵan.
«Oqıǵa barysynda úıdiń ıesi 55 jastaǵy áıel adamnyń denesiniń 80 paıyzyn, alty jasar qyz balanyń denesiniń 50 paıyzyn kúıik shalǵan. Olar Jańaqorǵan aýdandyq aýrýhanasyna jetkizildi. Oqıǵanyń mán-jaıy anyqtalýda», - dep málim etti oblystyq Tótenshe jaǵdaılar departamenti órt sóndirý jáne avarııalyq qutqarý jumystary qyzmetinen.
Eske salsaq, budan buryn Qyzylordada aýlasynda 10 tonna janarmaı saqtalǵan úıdegi órt sóndirildi. Órt ál-Farabı kóshesi boıyndaǵy úıde boldy. Órtti sóndirýge 52 qyzmetker men 11 tehnıka jumyldyryldy.
