Qyzylordada ǵasyr jasaǵan analarǵa qurmet kórsetildi

QYZYLORDA. QazAqparat - Qyzylorda qalasynyń ákimi Nurlybek Nálibaev oblys ortalyǵynda turatyn ǵasyr jasaǵan jáne ǵumyryn eńbekpen órnektegen keıýanalarmen júzdesip, olarǵa syı-qurmet kórsetti, dep habarlaıdy QazAqparat tilshisi.

Bul ıgi shara Halyqaralyq qarttar kúnine oraılastyryldy. Keıýanalarmen júzdesýge qalalyq ardagerler keńesiniń tóraǵasy Saılaýbaı Ábishov te qatysty.

Qala basshysy aldymen bıologııa ǵylymdarynyń kandıdaty, oblystyq dárejedegi derbes zeınetker 87 jastaǵy Alma Aqdaýletovanyń otbasyna bardy. Tyl ardagerimen qalanyń tynys-tirshiligi jaıynda áńgime órbidi. Qadirmendi qarııa eńbek jolyn ustazdyq qyzmetten bastaǵan. Keıinnen oblystyq partııa komıtetinde qyzmet atqardy. Oblystyq Keńes atqarý Komıtetinde jaýapty hatshy, oblpartkom tóraǵasynyń orynbasary boldy.

Qala basshysy Alma Tanabaıqyzynyń aımaq damýyna qosqan eleýli úlesin atap ótti. Ol kisiniń ǵıbratty ǵumyry ulaǵatty urpaqtyń ónegesine aınalatynyn jetkizdi.

Odan ári qala basshysy 101 jasqa kelgen qazynaly qarııa Rahııa Aqjanovanyń shańyraǵyna bardy. Ǵasyr kýási bolǵan aıaýly ana Qazaly aýdany, Baıqoja stansasynda dúnıege kelgen. Uzaq jyldar boıy qoı baǵyp, beınetpen shyńdalǵan. Qazir de kilem toqyp, ony kishi kelinderine úıretedi. Ardaqty ana 2 bala tárbıeledi. Olardan 25 nemere súıip, 15 shóbere men 13 shópsheginiń qýanyshyn kórdi. Qala ákimi qazynaly qarııany merekesimen quttyqtap, uzaq ǵumyr tilep, syı-qurmet kórsetti.

Qala turǵyny Nesibeli Pirjanova bıyl ǵasyr toıyn toılady. Tutas áýlettiń máýeli báıteregi 8 bala, 25 nemere, 35 shóbere, 8 shópshegine tálim-taǵylymyn úıretip, ómir jolyn ónege etip keledi. Mal sharýashylyǵynda eseli eńbek etken qarııanyń áli de este saqtaý qabileti jaqsy.

Qarııalarmen kezdesýde qala basshysy búgingi jarqyn jetistikter keshegi aǵa býynnyń, qazynaly qarttarymyzdyń eseli eńbeginiń jemisi ekenin aıtyp, jas urpaqty adal eńbekke jeteleýde aqyly darııa qarııalardyń baǵdar bolatynyn jetkizdi.