Qyzylordada fızıka-matematıka mektebiniń negizi qalandy
Oblys ákimi Nurlybek Nálibaev jerlesterin zamanaýı úlgidegi jańa bilim ordasynyń irge kóterýimen quttyqtady.
«Memleket basshysy Qasym-Jomart Kemeluly Joldaýynda «Orta bilimniń sapasy – tabysty ult bolýdyń mańyzdy sharty. Árbir oqýshynyń bilim alyp, jan-jaqty damýy úshin qolaıly jaǵdaı jasalýy tıis» – degen bolatyn. Prezıdent qazirgi tsıfrlandyrý, ındýstrııalandyrý zamanynda ІT salasyna degen suranys pen tehnıkalyq ǵylymdardyń mańyzyn eskere kele, jaratylystaný-matematıka baǵytyndaǵy pánderge basymdyq berýdi tapsyrdy. Bul rette el damýyna ózindik úles qosatyn mamandardy oqytý, ІT salasyna jańa lep ákeletin baǵyttardy damytý – bizdiń ortaq mindetimiz.
Búgin – Syr jurtshylyǵy úshin aıryqsha qýanyshty kún. Oblys ákimdigi baspasóz qyzmetiniń málimetinshe, quny 8 mlrd teńge jańa mektep oqýshylarǵa sapaly bilim berýge múmkindik jasaıtyn zamanaýı jabdyqtarmen jaraqtalady. Mektep qurylysy kelesi jyly aıaqtalyp, oqýshylar men ustazdar ıgiligine beriledi. Shyn máninde balanyń ıgiliginen artyq qundylyq joq. Al ómirde óshpeıtin iz balaǵa bergen bilim men meıirim bolsa kerek. Balalarymyzdyń bolashaǵy zor bolsyn!», – dedi aımaq basshysy.
Jınalǵan qaýymdy memleket jáne qoǵam qaıratkeri Murat Baqtııaruly men bilim salasynyń ardageri B.Dosmanbetov quttyqtady.
Eske salsaq, ótken jyldyń jeltoqsan aıynda Úkimet basshysy Álıhan Smaıylov Syr óńirine arnaıy jumys sapary kezinde Qyzylorda qalasynda daryndy balalarǵa arnalǵan fızıka-matematıka mektep-ınternatynyń qurylysyn bastaýǵa qoldaý bildirdi. Osy tizimge №101 Á.Múslimov jáne №2 Abaı atyndaǵy mektepterge qosymsha qurylys salý, «Báıterek» turǵyn aýdanynan 600 oryndyq jáne Shıeli aýdany Baısyn aýylynan 250 oryndyq mektep qurylysyn aıaqtaý engizildi. Merdiger mekeme «Promstroıservıs E» qurylys kompanııasy mektep ǵımaratyn keler jyly aıaqtap, paıdalanýǵa beredi dep josparlanyp otyr.
Ótken jyly aımaqta 19 balabaqsha, 6 mektep, Jalaǵash aýdanynda Oqýshylar úıi jáne Óner mektebi paıdalanýǵa berilgeni belgili. Aldaǵy 3 jylda 64 balabaqsha jáne «Jaıly mektep» ulttyq jobasy aıasynda 15 100 orynǵa arnalǵan 21 mektep salynbaq. Jeke mektepterdiń de úlesi artyp keledi. Qazirdiń ózinde óńirde 21 jeke mektep jumys istese, aldaǵy 3 jylda ınvestorlar 12 mektep salýǵa nıet bildirdi.
