Qyzylordada Eýropalyq ımmýndaý aptalyǵy júrgiziledi

QYZYLORDA. QazAqparat - Dúnıejúzilik densaýlyq saqtaý uıymynyń bastamasymen 2005 jyldan beri Eýropalyq ımmýndaý júıesi jyl saıyn ótkiziledi. Bıyl elimizde sáýir aıynyń 23-29 aralyǵynda ótkizilmek. Bul týraly Óńirlik kommýnıkatsııalar qyzmetiniń aqparat alańynda ótken brıfıngte Qyzylorda oblysynyń sanıtarııalyq-epıdemıologııalyq baqylaý departamentiniń bólim basshysy Álııa Idrısova málimdedi, dep habarlaıdy QazAqparat.

«Ekpe egý – qoǵamǵa ortaq jaýapty qadam. Bul aptalyqtyń basty maqsaty – halyqty vaktsınalardyń tıimdiligi, qaýipsizdigi týraly habardar etý, ımmýndaýǵa oń kózqarasty qalyptastyrý, tıisti kontıngentti ekpelermen qamtý jáne pandemııa týdyrǵan olqylyqtardyń ornyn toltyrý bolyp tabylady. Osy jyly ınfektsııalyq aýrýlarǵa qarsy profılaktıkalyq egý kórsetkishi 32 paıyzdy qurady. Vaktsınadan keıin asqynýlar barysy tirkelgen joq. Júrgizilgen profılaktıkalyq egýlerdiń arqasynda oblys aýmaǵynda sońǵy 15 jylda dıfterııa, polıomıelıt, kókjótel, sirespe sııaqty ınfektsııalyq aýrýlar tirkelmegen. Profılaktıkalyq ekpeler arnaıy daıyndyqtan ótken meıirgerlermen egý kabınetterinde júrgiziledi. Búgingi tańda Qyzylorda oblysynda 210 ekpe kabıneti jumyldyrylǵan. Immýndaý aqysyz negizde júrgiziledi. Sonymen qatar, sanepıd baqylaý qyzmeti men emdeý mekemeleriniń dárigerlerimen birge ekpelerdiń sapasy men qaýipsizdigi, qajettiligi men mańyzy boıynsha turǵyndar arasynda turaqty túrde sanıtarııalyq aǵartý jumystary júrgiziledi. Shara óz nátıjesin berýde. Bıylǵy jyldyń ózinde túsindirme jumystarynyń arqasynda segiz ata-ana balalaryna ekpe saldyrtqan», - dedi Álııa Nurmaǵanbetqyzy.

«Qazirgi tańda basty máselelerdiń biri ata-analardyń vaktsınadan bas tartýy bolyp tabylady. Biraq, bul qate pikir. Vaktsına sirespe, qyzylsha aýrýynyń aldyn alady. Sońǵy jylda aımaqta profılaktıkalyq vaktsınaǵa aryz-shaǵym bolǵan joq. Bala týǵannan ımmýnıtetin kóterýge vaktsına salady. Bala vaktsınany kótere almaı qaldy degen jaılar tirkelgen joq»,- dedi 1-shi qalalyq emhananyń pedıatry Aıjan Qaıranbaeva.