Qyzylordada et kombınatynyń irgetasy qalandy
Kombınat Qyzylorda qalasy mańyndaǵy Talsýat eldimekeninde ornalasqan.
«Tuńǵysh Prezıdent - Elbasy Nursultan Nazarbaevtyń tapsyrmasyna sáıkes qazir elimizde «Etti mal sharýashylyǵyn damytý» baǵdarlamasy qabyldanyp, iske asyrylýda. 2016 jyly oblys býferlik aımaqtan shyǵarylyp, et eksporttaıtyn aımaqtardyń qataryna endi. Degenmen, oblysta halyqaralyq standartqa saı et kombınatynyń bolǵan joq. Sondyqtan biz búginge deıin iri qara, qoı, túıe maldaryn tirileı eksporttap keldik. Búgin irgetasyn qalaǵaly otyrǵan et kombınatynyń qurylysy arqyly biz oblystyń azyq-túlik qaýipsizdigin nyǵaıtyp, et eksportyn ulǵaıtatyn bolamyz», - dedi Qyzylorda oblysynyń ákimi Qyrymbek Kósherbaev.
Oblys ortalyǵynda salynyp jatqan kombınat vakýýmdyq qaptamada jylyna 5 myń tonna tereń óńdelgen et óndiredi. Sondaı-aq, munda 25 adamdy eńbekpen qamtýǵa jol ashyldy. Budan basqa, osy jobany iske asyrý aýyl sharýashylyǵy aınalymyna shamamen 9 mln gektar jaıylymdyq jerlerdi aınalymǵa qosýǵa jáne myńdaǵan aýyl turǵyny úshin turaqty jumys oryndarynyń ashylýyna óz septigin tıgizedi. Et kombınatynyń negizgi ınvestory - «Syr marjany» seriktestigi.
Nysan jyl sońyna deıin aıaqtalady dep josparlanýda.
Byltyr Syr óńirinen eksportqa Ózbekstan, Iran, Birikken Arab Ámirligine jáne Reseıge 10,4 myń bas qoı, 100 bas sıyr, 366 bas tiri túıe jiberildi. Ony ónim túrine aınaldyrsaq, 300 tonna etti shamalaıdy. Sońǵy jyldary oblystyń aýyl sharýashylyǵy kesheni boıynsha eksporttalatyn ónimder 3-ten 15-ke deıin artty. Al 2018 jyldyń qorytyndysy boıynsha eksporttyń 97% - óńdelgen ónimniń úlesine tıesili.
Aımaqta 2022 jylǵa deıin agrokarta ázirlendi. Onyń sheńberinde 2021 jylǵa qaraı aýyl sharýashylyǵy ónimderiniń (et, kúrish, balyq jáne baqsha ónimderi) eksportyn 5 esege ulǵaıtý kózdelgen. Aldaǵy 3 jylda aýyl sharýashylyǵy keshenin damytý boıynsha 76 jobany iske asyrý josparlanýda. Bul óz kezeginde 500 astam jańa jumys ornyn ashýǵa múmkindik beredi.
