Qyzylordada esirtki tasymaldaǵan adam qolǵa tústi

QYZYLORDA. QazAqparat - Qyzylorda oblysy Aral aýdanynda esirtki tasymaldaǵan 36 jastaǵy turǵyn qolǵa tústi, dep habarlaıdy QazAqparat tilshisi.

Jergilikti patrýldik polıtsııa qyzmetkerleri jedel-profılaktıkalyq is-shara júrgizgen bolatyn. Іs-shara barysynda «Batys Eýropa - Batys Qytaı» tas jolynda Aral aýdany tusynda kúdik týdyrǵan jeńil avtokólik toqtatyldy.

«Avtokóliktiń artqy salonynan erekshe ıisi bar shóp salynǵan 2 dana polıetılen paketi jáne gazetke oralǵan erekshe ıisi bar shópke uqsas zat alyndy. Saraptama qorytyndysy boıynsha ol keptirilgen marıhýana ekendigi anyqtaldy. Avtokólik júrgizýshisi Aral aýdanynyń 36 jastaǵy turǵyny bolyp shyqty. Búgingi kúni kúdikti Aral aýdany polıtsııa bóliminiń ýaqytsha ustaý abaqtysyna qamaqqa alyndy. Oǵan qatysty QR Qylmystyq kodeksiniń 296-baby 3-bóligimen sotqa deıingi tergep-tekserý amaldary júrgizilýde. Onda esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý jaǵdaıy kórsetilgen», dep málim etti Qyzylorda oblystyq polıtsııa departamentiniń baspasóz qyzmeti.

Budan buryn Qyzylordada jeńil avtokólikten 16 keli marıhýana tabyldy.