Qyzylordada esirtki ósirgen 60 jastaǵy er adam ustaldy
ASTANA. QazAqparat - Qyzylorda oblysynyń Іshki ister departamenti Esirtki bıznesine qarsy kúres basqarmasy men Syrdarııa aýdandyq ishki ister bólimi qyzmetkerleriniń birlesken jumysy nátıjesinde esirtki alqaby anyqtaldy, dep habarlaıdy QazAqparat OІІD baspasóz qyzmetine silteme jasap.
Tamyz aıynyń 18 kúni aýmaqqa barlaý jumystaryn júrgizý barysynda polıtsııa qyzmetkerleri Syrdarııa aýdany Shirkeıli aýyldyq okrýginen 6 km qashyqtyqtaǵy qumdardyń arasynan 100 sh.m. sozylǵan esirtki alqabyn anyqtady. Oqıǵa ornynan egip-baptaý jumystarymen aınalysyp jatyrǵan 1957 jyly týylǵan azamat ustaldy. Aıǵaq zat retinde alynǵan 47 túp shóptektes zatqa saraptama taǵaıyndalyp, nátıjesinde jalpy salmaǵy 47 kg-dy quraıtyn quramynda esirtki zaty bar sora ósimdigi ekendigi naqtylandy.
Budan bólek, oqıǵa ornynan ózine tán ıisi bar ósimdik tektes zat salynǵan qalta anyqtalyp, saraptama qorytyndysymen jalpy salmaǵy 1 kg 240 gr-dy quraıtyn «keptirilgen marıhýana» ekendigi anyqtaldy.
Sonymen qatar tergeý jumystary barysynda atalǵan azamat budan bólek 2 esirtki alqabynda egin baptaý jumystaryn júrgizgeni belgili boldy. 1600 sh.m. sozylǵan birinshi esirtki alqabynan 700 túp, ekinshi alqaptan 78 túp sora ósimdigi alynyp, saraptama qorytyndysymen quramynda esirtki zaty bar sora ósimdigi ekendigi naqtylandy.
Qazirgi ýaqytta, sezikti Syrdarııa aýdandyq ishki ister bóliminiń Ýaqytsha ustaý abaqtasyna qamaqqa alyndy. Atalǵan derek Qazaqstan Respýblıkasy Qylmystyq kodeksiniń 300-baby 2-bóligi, 296-baby 4-bóligimen sotqa deıingi tergep-tekserýdiń biryńǵaı tizilimine tirkelip, sotqa deıingi tergep-tekserý amaldary júrgizilýde.
