Qyzylordada erekshe kútimdi qajet etetin balalarǵa qandaı qoldaý kórsetiledi
Búgin oblys ákimi Gúlshara Ábdiqalyqova Jastar resýrstyq ortalyǵynda Táýelsizdigimizdiń 30 jyldyǵy qarsańynda uıymdastyrylǵan «Biz - ómirdiń gúlimiz» atty merekelik shara barysynda erekshe kútimdi qajet etetin balalarmen júzdesti. Júzdesýge óńirdegi ánshi, bıshi, sporttyq jarystarda aldyńǵy qatarda júrgen ónerli balalar qatysty. Aldymen aımaq basshysy erekshe jasóspirimderdiń qolymen jasalǵan buıymdar kórmesin tamashalady.
«Tuńǵysh Prezıdent - Elbasy Nursultan Nazarbaevtyń bastamasymen bul baǵytta kezinde kóptegen jobalar júzege asty. Memleket tarapynan barlyq qajetti zańdar jáne normatıvti-quqyqtyq aktiler qabyldandy.
Prezıdent Qasym-Jomart Toqaev múgedektigi bar adamdardyń quqyqtaryn qamtamasyz etý jáne turmys sapasyn jaqsartý jónindegi zań qabyldady. Zań sheńberinde túrli memlekettik qoldaý sharalary jáne járdemaqy kólemi aıqyndalǵan. Sizderdiń ómir súrýge degen qushtarlyqtaryńyz, jańa jetistikke jetýge degenen yntalaryńyz biz úshin qymbat», - dedi Gúlshara Ábdiqalyqova.
Júzdesý barysynda «Júrek jylýy» jáne «Juldyzaı» balalar shyǵarmashylyǵy festıvalderinde án jáne qolóner janrlary boıynsha birinshi oryn alǵan Myrzaly Serikov, QR sport sheberi, voleıboldan otyryp oınaýdan respýblıkalyq jarystyń jeńimpazy Ádilet Ahmetov, ústel tennısinen sport sheberi Ulan Amangeldıev, otyryp oınaý voleıbolynan QR sport sheberi Erasyl Ábdibek jáne kóptegen baıqaýlarda júldege atanǵan Nurbaqyt Tánıeva oblys ákiminiń «Alǵys hatymen» marapattaldy.
Aıta ketý kerek, múmkindigi shekteýli jandardyń turmys sapasyn jaqsartý boıynsha óńirde aýqymdy sharalar qolǵa alynǵan. Atalǵan baǵytta 2025 jylǵa deıingi is-sharalardyń Jol kartasy bekitildi.
Eske salsaq, budan buryn Qyzylordada aýyl sharýashylyǵy salasynyń úzdikteri marapattaldy.
