Qyzylordada endokrınologııa jáne terapııa klınıkasy ashyldy
QYZYLORDA. QazAqparat - Qyzylorda qalasynda endokrınologııa jáne jalpy terapııa medıtsınalyq klınıkasy ashyldy. Bul týraly QazAqparat tilshisi habarlady.
Ashylý saltanatyna arnaıy qatysqan qala ákimi Nurlybek Mashbekuly, turǵyndardy jańa zamanaýı klınıkanyń ashylýymen quttyqtap, joba jetekshisine alǵysyn jetkizdi.
- Kez kelgen memlekettiń eń basty baılyǵy, bul - adamı kapıtaly. Bizdiń basty maqsatymyz da, halyqtyń áleýmettik jaǵdaıymen qatar rýhanı jáne densaýlyq jaǵdaıyn jaqsartý bolyp tabylady.
Ózderińiz bilesizder, sońǵy jyldary bizdiń óńirimizde jergilikti ınvestorlardy tarta otyryp, memlekettik - jekeshelik áriptestik aıasynda qala halqyna qajetti túrli áleýmettik nysandar iske qosyldy.
Qalamyzda densaýlyq saqtaý nysandarynyń sanyn arttyryp otyrǵany úshin joba jetekshisi Sergeı Kımge rııasyz alǵysymdy bildiremin jáne jańa bastamalaryńyzǵa tabys tileımin. Jańadan ashylǵaly turǵan bul ǵımarat halyqtyń ıgiligi úshin qyzmet etsin»,- dedi N.Nálibaev.
«Agrohımservıs» jaýapkershiligi shekteýli seriktestigi júzege asyrǵan bul jobanyń jalpy quny - 550 mln teńge bolsa, onyń 130 mln teńgesi Damý qory arqyly jeńildetilgen nesıemen qarjylandyrylǵan.
1 myń 200 sharshy metrdi quraıtyn jańa klınıka qala halqyna medıtsınalyq kómek kórsetýge qajetti zamanaýı quraldarmen qamtamasyz etilgen jáne jalpy terapııalyq qyzmet kórsetedi.
Eń mańyzdysy, bul klınıka 40 adamdy turaqty jumyspen qamtıdy.
