Qyzylordada eń úzdik mektepke 34 mln teńge tabystaldy
Búgin oblys ákimi Gúlshara Ábdiqalyqovanyń qatysýymen «Bilimdi ult - turaqty damý kepili» taqyrybyndaǵy bilim berý qyzmetkerleriniń pedagogıkalyq tamyz keńesi ótti. Aımaq pedagogtarynyń basqosýyna QR Parlamentiniń depýtattary Murat Baqtııaruly, Aqmaral Álnazarova, Balaıym Kesebaeva, «Talap» KE AQ vıtse-prezıdenti Sanjar Tátibekov jáne ZOOM platformasy arqyly Y.Altynsarın atyndaǵy Ulttyq bilim akademııasynyń prezıdenti Ǵanı Beısembaev qatysty. Sondaı-aq, pandemııa jaǵdaıyn eskere otyryp, keńes jumysyna Qyzylorda qalasy jáne aýdan ákimderi, aımaqtaǵy bilim berý uıymdarynan 400-ge jýyq ókil ZOOM platformasy arqyly qosyldy.
«El táýelsizdiginiń 30 jyldyǵy qarsańynda ótkizilip otyrǵan dástúrli tamyz konferentsııasynda bilim salasynyń keshendi damý josparyn aıqyndalyp, aldaǵy mindetter saralanady. Bıyl Úkimet dástúrli formatta oqytý týraly sheshim qabyldandy. Ótken aptada jáne keshe qala, aýyldardy aralap, birneshe mekteptiń jańa oqý jylyna daıyndyq barysyn ózim kórip shyqtym. Oblys boıynsha bilim berý uıymdary 1 qyrkúıekte oqýshylardy qabyldaýǵa daıyn. Іndettiń jańa shtamdary paıda bolǵan qazirgideı qıyn kezeńde biz úshin árbir balanyń densaýlyǵy mańyzdy. Sondyqtan oblystyq bilim basqarmasyna barlyq bilim uıymdarynda sanıtarlyq talaptardy qatań saqtaýdy, balalar ómiriniń qaýipsizdigin qamtamasyz etý máselesin erekshe baqylaýda ustaýdy tapsyramyn», - dedi oblys ákimi Gúlshara Ábdiqalyqova.
Elimizde pedagog jáne olarǵa teńestirilgen qyzmetkerlerdiń eńbekaqysy bıyl 50%-ǵa kóterildi. Aldaǵy eki jylda eńbekaqy eki esege deıin ósedi. Osy jyly respýblıkalyq bıýdjetten bul maqsatqa 32,2 mlrd tenge qarjy bólindi. Ústimizdegi jyly bilim salasynyń bıýdjeti 185 mlrd. teńgeni qurady, bul ótken jylmen salystyrǵanda 14 paıyzǵa artty. Sáıkesinshe, jańa reformaǵa sáıkes muǵalimderge qoıylatyn talap ta kúsheıdi.
Jıynda Senat depýtaty Murat Baqtııaruly men Májilisi tóraǵasynyń orynbasary Balaıym Kesebaeva bilim salasyndaǵy mańyzdy máselelerdi kóterdi. Atap aıtsaq, bilim berý uıymdaryndaǵy bilim sapasynyń aıyrmashylyǵy, ınklıýzıvti bilim berý úshin arnaıy mektep ashý, muǵalimderdiń medıtsınalyq anyqtamasyn ázirleýde jeńildikter qarastyrý sekildi usynystaryn jetkizdi.
Sonymen qatar aımaq pedagogtarynyń basqosýynda Y.Altynsarın atyndaǵy Ulttyq bilim akademııasynyń prezıdenti Ǵanı Beısembaev «Bilim alýshylardyń bilimin tolyqtyrý jańa oqý jylynyń basty mindeti», «Talap» Kommertsııalyq emes aktsıonerlik qoǵamynyń vıtse-prezıdenti Sanjar Tátibekov «Tehnıkalyq jáne kásiptik bilim berýdi transformatsııalaýdyń ózekti baǵyttary» taqyryptarynda baıandama jasady.
Oblystyq bilim basqarmasynyń basshysy Aqzıra Qasymova atqarylǵan jumystar men aldaǵy mindetter týraly baıandady.
«Byltyrǵy jyly onlaın oqytý mektepterdiń kompıýterlik parkin jańartýǵa da septigin tıgizdi. Osylaısha kompıýterler parkin tolyqtaı jańartý arqyly bir oqýshy sanyna shaqqandaǵy kompıýterler kórsetkishi 14-ten 5-ke deıin tómendedi. Bilim salasynyń bastapqy satysy - mektepke deıingi tárbıe baǵytynda da nátıjeli qadamdar bar. Oblysta 670 mektepke deıingi uıymdarda 58 myńnan astam bala tárbıelenýde. Bıylǵy jylǵy maqsat - tirek bilim berý uıymdary arqyly tájirıbeni ár aýdannan ІT balabaqsha jelisin ashatyn bolamyz», - dedi Aqzıra Qasymova.
Jańa oqý jylynda 294 memlekettik jáne 10 jeke mektepte 177 myń oqýshy bilim alady. Onyń ishinde 1-synypqa 18 myńnan asa bala qabyldanady.
Dástúrli formatta oqýdy bastaıtyn mektep oqýshylary men muǵalimderdiń qaýipsizdigi úshin barlyq bilim berý uıymdary «Ashyq» qosymshasyna qosyldy. Pedagogtardyń 97% vaktsınatsııalandy. Oqý jylynyń bastalýyna deıin bul kórsetkish 100% jetedi dep josparlanýda.
Aımaq mektepteri beınebaqylaý júıesimen tolyqtaı qamtyldy. Ótken jyly 70 mektep jedel basqarý ortalyǵyna qosylsa, bıyl 35 mektep ulttyq beınemonıtorıng júıesiniń tikeleı baqylaýyna engen.
Aldaǵy 5 jylda óńirde 28 mektep qurylysy bastalyp, bıyl 6 jańa mektep paıdalanýǵa beriledi. Bıyl Aral aýdany, Sekseýil kentindegi 300 oryndyq mektep pen ınvestorlar esebinen júrgizilgen 2 jeke mektep qurylysy da oqý bastalǵansha bitedi. Qalǵan 3 mektepti jyl sońyna deıin tabystalady.
Saltanatty sharada bilim berý isine eleýli úles qosyp, otandyq bilim men ǵylym salasyna erekshe eńbek sińirgen úzdikter marapattaldy.
Oblys ákiminiń «Úzdik orta bilim uıymy» grantymen oblystyq konkýrs jeńimpazy – Qyzylorda qalasy, Tákeı Esetov atyndaǵy №264 mektep-lıtseıi marapattaldy. Syıaqy mólsheri - 34 mln teńge.
