Qyzylordada emdeý oryndary jasandy jeldetý apparatymen tolyqtaı qamtylǵan
Koronavırýs pandemııasy bastalǵan kezeńde óńirde barlyǵy 76 ókpeni jasandy jeldetý apparaty (IVL) boldy. Qazir olardyń sany 251-ge jetti. Ortalyqtandyrylǵan ottegimen 518 tósek orny jabdyqtalǵan.
«Aımaqta kóp beıindi oblystyq aýrýhana men Qazaly aýdanynda 2 ottegi stansasy ornatylǵan. Ótken jyldyń qarasha aıynda kóp beıindi oblystyq aýrýhana janynan iske qosylǵan ottegi óndirýshi stansa kúnine 160-qa jýyq ballondy ottegimen toltyrady. Osylaısha aıyna 4200-ge jýyq ballondy ottegimen qamtamasyz etýde. Bul aýrýhanany tolyq qamtamasyz etýge jetkilikti. Al, Qazaly aýdanaralyq aýrýhanasy janynan ashylǵan ottegi óndiretin stansa kúnine 60-qa jýyq, aıyna orta eseppen 1800 ballondy ottegimen qamtamasyz etedi», - dedi oblystyq densaýlyq saqtaý basqarmasynyń basshysy Sábıt Pazılov.
Odan bólek, densaýlyq saqtaý uıymdaryna demeýshiler esebinen 682 dana ottegi kontsentratorlary jetkizildi. Atalǵan qurylǵy ottegini qajet etetin tynys aýrýlaryn emdeý kezinde jáne aýrýhanalarǵa aýyr jaǵdaıda túsken naýqastarǵa, reanımatsııalyq jáne ıntensıvti terapııa bólimshelerinde qoldanylady.
Eske salsaq, budan buryn Qyzylorda oblysynda modýldik statsıonar jumysy iske qosyldy.