Qyzylordada Elbasy týraly kórmeni 130 myńnan astam adam tamashalady
Kórmeniń jabylý saltanatyna Qyzylorda oblysynyń ákimi Q.Kósherbaev, Qazaqstan Respýblıkasynyń Tuńǵysh Prezıdenti - Elbasy kitaphanasynyń dırektory Ámirhan Rahymjanov, zııaly qaýym ókilderi, qala turǵyndary men stýdent jastar, mádenıet salasynyń qyzmetkerleri qatysty.
Qyzylorda jurtshylyǵynyń nazaryna Elbasy kitaphanasynyń arhıv, kitaphana, mýzeı qorlarynyń materıaldary, N.Á.Nazarbaevtyń joǵary memlekettik marapattarynyń biregeı jınaǵy, memleket basshylary jáne qazaqstandyq avtorlar tartý etken qoltańbasy bar kitaptar, sonymen qatar N. Nazarbaevtyń basqa tilderge aýdarylǵan eńbekteri usynyldy.
Kórmeniń basty maqsaty - Elbasy N.Nazarbaevtyń táýelsiz Qazaqstannyń qalyptasýyndaǵy rólin kórsetý, Elbasynyń sarabdal saıasatynyń arqasynda júzege asqan jas memleketimizdiń álem aldynda bedeliniń artýyn jan-jaqty nasıhattaý.
Atalmysh kóshpeli kórme jobasy aıasynda «Rýhanı jańǵyrý» ortalyǵynda mýzeı salasynyń mamandarymen «Mýzeı salasyndaǵy aqparattandyrý» atty semınar, «Ashyq keńistik» formatynda «Elbasy kitaphanasynyń aqparattyq resýrstary» atty aımaqtyq kásibı sessııasy ótkizildi. Sondaı-aq, Shıeli, Qarmaqshy aýdandary turǵyndary úshin «Tuńǵysh» ekskýrsııalyq tujyrymdamasynyń aıasynda «Tarıhı tańdaý» ǵylymı-ekspozıtsııalyq jobasynyń kóshpeli ekskýrsııasy uıymdastyryldy. Ǵylymı-bilim berý jáne mádenı-aǵartý sharalary negizinde Baıqońyr qalasyndaǵy №277 mektep-lıtseıinde qala turǵyndary jáne stýdentter, oqýshylarmen kezdesý ótkizilip, Qyzylorda oblysynyń jas sýretshileriniń erekshe týyndylar toptamasynan kórme uıymdastyryldy.
Elbasy kitaphanasy usynǵan «N.Nazarbaev: dáýir, tulǵa, qoǵam» atty kóshpeli qor kórmesin eki aı merzimde 130 myńnan asa adam tamashalady. Kelýshiler arasynda sheteldikter de boldy.
Kórme Syr jurtshylyǵynyń yqylasyna bólenip, kelýshiler rızashylyqtaryn bildirdi. Sonymen qatar, kelýshiler kórmeniń joǵary deńgeıde uıymdastyrylǵanyn, ekspozıtsııalardyń zamanaýı ınteraktıvti tehnologııalarmen jabdyqtalǵanyn, ekskýrsııa júrgizýshilerdiń materıaldy áserli ári qyzyqty baıandaǵanyn atap ótti. Atalmysh kórme óńirdiń mádenı ómirine erekshe serpilis berdi.
