Qyzylordada eksportqa ónim shyǵaratyn kásiporyndar qatary kóbeıdi
QYZYLORDA. QazAqparat - Qyzylorda oblysynda óz ónimderin eksportqa shyǵaratyn kásiporyndar qatary kóbeıip keledi, dep habarlaıdy QazAqparat tilshisi.
2009 jyly elimizde otandyq taýaróndirýshilerdi qoldaý maqsatynda «CT-KZ» sertıfıkaty qoldanysqa engizildi. Ol ónimniń Qazaqstannan shyǵatyndyǵyn kórsetip, taýardyń shyǵý tegin aıqyndaıdy.
«Syr óńirinen taýarlardy eksporttaýǵa arnalǵan sertıfıkat negizinen kúrishke, balyqqa, as tuzy men mazýtqa, munaı men vanadıı kenine berilýde. 2017 jyldan bastap saflor maıyn Qytaıǵa eksportqa shyǵaryp jatqan kásipkerimiz bar. Kóńil qýantarlyǵy, sońǵy eki jylda eksportqa shyǵarylatyn taýarlarǵa rásimdelgen sertıfıkattardyń kólemi 40 paıyzǵa ósken. Bul óńirimizde eksport kóleminiń artqandyǵyn kórsetip otyr», - deıdi oblystyq kásipkerler palatasynyń dırektory Ǵalymbek Jaqsylyqov.
Búginde qyzylordalyq ónimder TMD elderimen birge, Qytaı, Mońǵolııa, Aýǵanstan, Latvııa, Shveıtsarııa elderine eksportqa shyǵyp otyr.
Budan buryn Qyzylordada ıspanııalyq tehnologııamen qyzanaq ósiretin jylyjaı iske qosylatynyn habarlaǵan edik.
