Qyzylordada eksportqa ónim shyǵaratyn tsement zaýyty iske qosylmaq
QYZYLORDA. QazAqparat - Qyzylorda oblysy, Shıeli aýdanyndaǵy jatqan tsement zaýyty jyl sońyna qaraı iske qosylady, dep habarlaıdy QazAqparat tilshisi oblys ákimi baspasóz qyzmetine silteme jasap.
Búgingi tańda qurylys alańynda 662 adam eńbek etip júr. Qazirge deıin munda jumystyń 90% aıaqtalǵan. Óndiris orny 2018 jyldyń jeltoqsanynda paıdalanýǵa beriledi dep mejelengen.
Oblys ákimi Qyrymbek Kósherbaev Shıeli aýdanyna jumys sapary barysynda zaýyttyń qurylys jumystarymen tanysyp, Qytaı Halyq Respýblıkasynan bilim alyp kelgen 17 jas mamanmen kezdesti.
Esterińizge salaıyq, jergilikti turǵyndardy jumysqa tartý úshin «Gejýba Shıeli Tsement» kompanııasy aýdandaǵy ındýstrıaldy kolledjdiń túlekterin 46 adamdy bilim alýǵa ári zaýytta jumys isteýge daıarlyqtan ótýge jibergen bolatyn. Aımaq basshysy oqýyn támamdap kelgen alǵashqy 17 túlekpen kezdesti. Qazirgi tańda ekinshi toppen oqıtyn 80 stýdent iriktelip alyndy.
Memlekettik-jekemenshik áriptestik sheńberinde zaýytqa elektr jelisimen jabdyqtaý jáne temirjol salý jumystary júrgizilýde. Sondaı-aq, oblystyq bıýdjetten ónerkásiptik aımaqqa gaz qubyryn salý úshin qarajat bólindi.
Esterińizge salaıyq, Shıelidegi tsement óndiretin zaýyttyń jobalyq qýaty jylyna 1 mln tonnany quraıdy. Joba aıasynda 50 gektar jer telimi bólindi. Onyń 46 gektary naqty zaýyt qurylysy úshin paıdalanylady. Al qalǵan aýmaǵynda qyzmetkerlerge arnalǵan áleýmettik nysandardyń qurylysy júrgizilýde.
Kásiporyn ónimderi Eýrazııalyq ekonomıkalyq odaq, TMD jáne QHR elderine jetkiziledi. Jobany iske asyrý úshin «DANAKE Korporatsııasy» JShS jáne qytaılyq kompanııa «Gezhouba Group Cement Co. Ltd» aıasynda «Kompanııa Gejýba Shıeli Tsement» JShS birlesken kásiporny quryldy.
Zaýyt tolyq iske qosylǵan kezde ónerkásipte 220 turaqty jumys orny qurylady.
