Qyzylordada eki júk kóligi soqtyǵysyp, 1 adam mert boldy

QYZYLORDA. QazAqparat - Búgin Qyzylorda oblysynda «Batys Eýropa - Batys Qytaı» tasjolynyń boıynda eki júk kóligi soǵysty. Apatyń saldarynan bir adam qaza boldy, dep habarlaıdy QazAqparat tilshisi.

Kólik apaty Qarmaqshy aýdanyna qarasty II Internatsıonal aýylynyń tusynda jergilikti ýaqytpen saǵat 15.00-de boldy. Jol boıynda «Volvo» markaly júk kóliginiń júrgizýshisi kólikti basqara almaı qalǵan.

«Sonyń saldarynan «Volvo» qarama-qarsy baǵytta kele jatqan «KaMAZ» júk kóligin soqqan. Nátıjesinde «KaMAZ» júk kóliginiń júrgizýshisi qaıtys boldy. Atalǵan derek boıynsha QR Qylmystyq Kodeksiniń 345-babynyń 3-bóligimen sotqa deıingi tergep-tekserý amaldary júrgizilýde. Onda abaısyzda adamnyń ólimine ákep soqqan jol júrisi qaǵıdalaryn buzý jaǵdaıy bolǵandyǵy kórsetilgen. Qylmystyq is boıynsha barlyq qajetti sot saraptamalary taǵaıyndaldy. Oqıǵanyń mán-jaıy anyqtalýda», - dep málim etti Qyzylorda oblystyq polıtsııa departamentiniń baspaóz qyzmeti.

Budan buryn Qyzylordada jolda aýdarylǵan kólik ishinen bir otbasynyń bes adamy qutqaryldy.