Qyzylordada eki jasóspirim qyz bala kanalǵa batyp ketti

QYZYLORDA. QazAqparat - Qyzylorda oblysynda 14 jáne 17 jastaǵy eki qyz bala kanalǵa sýǵa batyp ketti, dep habarlaıdy QazAqparat tilshisi.

Qaıǵyly oqıǵa Qazaly aýdanyna qarasty Basyqara aýyly aýmaǵyndaǵy «13 beket» sýarý kanalynda 21 tamyzda saǵat 18.38 shamasynda bolǵan. Bul jónindegi habar oblystyq tótenshe jaǵdaılar departamenti kúshter men quraldardy jedel basqarý ortalyǵyna kelip tústi.

«Kanalǵa 2004 jáne 2007 jylǵy eki qyz bala abaısyzda batyp ketken. Jergilikti turǵyndar kúshimen 14 jastaǵy qyzdyń denesi sýdan shyǵaryldy. Qutqarýshylar 17 jastaǵy qyzdyń denesin bir kúnnen keıin sýǵa batqan jerinen bes shaqyrymdaı qashyqtan tapty. Іzdestirýge jedel qutqarý jasaǵynan 4 qutqarýshysy 1 tehnıka jáne 1 qaıyqpen bardy», - dep málim etti Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Málim bolǵanyndaı, 14 jastaǵy qyz aýyldaǵy mektepte toǵyzynshy synypta oqysa, 17 jastaǵy qyz oblys ortalyǵyndaǵy joǵary oqý oryndarynyń birinde bilim alǵan.

Eske salsaq, Qyzylordada Syrdarııa jaǵasyna jete almaı qalǵan jasóspirim qutqaryldy.