Qyzylordada eki turǵyn aqbóken múıizimen qolǵa tústi
QYZYLORDA. QazAqparat - Qyzylorda oblysynda turǵyndar paıdalanýǵa tyıym salynǵan aqbóken múıizimen qolǵa tústi, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.
Oblys aýmaǵynda 10-17 aqpan kúnderi «Brakoner» jedel-profılaktıkalyq is-sharasy ótkizildi. Nátıjesinde Qazaly jáne Aral aýdandarynda polıetılen paketke aqbóken múıizin salyp alǵan jergilikti turǵyndar qolǵa tústi.
«Atalǵan derek boıynsha QR Qylmystyq kodeksiniń 339-baby boıynsha sotqa deıingi tergep-tekserý júrgizilýde. Onda ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý jaǵdaıy kórsetilgen», - dep málim etti Qyzylorda oblystyq polıtsııa departamentiniń baspasóz qyzmeti.
