Qyzylordada eki mektep oqýshylary fýtbol oıyny kezinde tóbelesip qaldy
QYZYLORDA. QazAqparat - Qyzylorda qalasynda eki mekteptiń oqýshylary fýtbol oıyny kezinde tóbelesip qaldy, dep habarlaıdy QazAqparat tilshisi.
Áleýmettik jelide qaladaǵy mektepterdiń birinde fýtbol oıyny kezinde oqýshylar tóbelesip qalǵany jóninde beınejazba jarııalandy. Onda №176 jáne №271 mektep oqýshylary arasynda janjal týyndaǵany aıtylǵan.
Bul jóninde qalalyq bilim bólimi tómendegishe jaýap berdi.
«13 sáýir kúni №271 orta mektepte 9-11 synyp oqýshylary arasynda ulttyq mektep lıgasy jarysy ótken edi. Oıyn barysynda jeńilip qalǵan komandadan eki-úsh oqýshy arasynda janjal shyqqan. Muǵalimderdiń aralasýymen janjal der kezinde toqtatyldy. Balalar zardap shekken joq. Olar ata-analarynyń qaraýynda. Oqıǵa ornynda medıtsına qyzmetkerleri bolǵan. Alaıda, olardyń qajettiligi týyndaǵan joq», - dep jazylǵan habarlamada.
Oqıǵaǵa baılanysty Qyzylorda oblystyq polıtsııa departamenti túsinikteme berdi.
«Atalǵan derek Qyzylorda qalalyq polıtsııa basqarmasynyń sotqa deıingi tergep-tekserýdiń biryńǵaı tizilimine QR Qylmystyq kodeksiniń 293-baby boıynsha tirkeldi. Tergeý júrgizilýde. Mán-jaıdy anyqtaý maqsatynda tóbeleske qatysýshylar polıtsııaǵa jetkizildi.
Olardyń is-áreketterine quqyqtyq baǵa beriledi. Sondaı-aq, qatysýshylar arasynda janjal týyndaǵan sporttyq týrnırdiń uıymdastyrýshylary da polıtsııaǵa jetkizildi», - dep málim etti departamentten.
Eske salsaq, budan buryn Qyzylordada oqýshylar tóbelesip, bireýi pyshaq jaraqatyn aldy.
Al Qyzylorda qalasynda taǵy bir jasóspirim tóbeleste alǵan jaraqatymen aýrýhanaǵa jetkizildi.
Sondaı-aq, Qazaly aýdanynda jasóspirimdi soqqyǵa jyqqan 5 oqýshy polıtsııaǵa jetkizildi.
