Qyzylordada eki kúnde 3 adam sýǵa ketti
Bul jóninde óńirlik kommýnıkatsııa qyzmetinde ótken brıfıngte Qyzylorda oblystyq tótenshe jaǵdaılar departamentiniń bastyǵy Omar Berjanov málim etti.
«30 mamyrda oblys ortalyǵynyń «Mereı» shaǵyn aýdanyndaǵy Syrdarııa ózeni aýmaǵynda bir adamnyń batyp ketkeni jóninde habarlama kelip tústi. Oqıǵa ornyna sýdan qutqarýshylar kelip jetkennen keıin máseleniń mán-jaıy anyqtaldy. Qyzylordada kolledjde oqıtyn 4 jas azamat darııanyń sýǵa túsýge ruqsat etilmegen aýmaǵynda sýǵa túsedi. Sýǵa túsý barysynda olardyń biriniń aıaq-qoly tartylyp qalady. Nátıjesinde ol eski jaǵajaıdan 300 metrdeı qashyqtyqta sýdyń qurbanyna aınaldy», - dedi Qyzylorda oblystyq tótenshe jaǵdaılar departamentiniń bastyǵy Omar Berjanov.
Osyǵan uqsas taǵy bir jaǵdaı Qyzylorda qalasynyń Tıtov poselkesi Rısmash aýmaǵynda oryn aldy. Sol mańda ski tsellıýloza men karton zaýytynyń alańy 4 jáne 8 jas aralaǵyndaǵy tórt bala oınap júredi. Atalmysh aýmaq pen olardyń úıleriniń qashyqtyǵy 3 shaqyrymǵa jýyq.
«Bul aýmaqta buryn balyq ósiretin oryn bolǵan. Balalardyń barlyǵy - Tıtov poselkesinen. Degenmen olardyń barlyǵy ata-anasynyń qadaǵalaýynsyz qalǵan. Oınap júrgen balalar arasynan 4 jastaǵy jetkinshek beton ishindegi sýǵa qulap ketedi. Ony 8 jastaǵy aǵasy qutqarýǵa qol ushyn sozady. Alaıda ol da sýǵa qulap ketedi. Sonyń saldarynan eki bala da kóz jumdy», - dedi Omar Berjanov.
Qyzylorda oblysynda jyl basynan beri buǵan deıin 5 adam sýǵa ketken. Onyń ekeýi - bala. Byltyr dál osyndaı jaǵdaıdan 22 adam kóz jumǵan.
Oblystyq tótenshe jaǵdaılar departamentiniń basshysy Omar Berjanovtyń aıtýynsha, qaýipsizdik erejeleri saqtala bermeıdi. Eresekter balalardy baqylaýsyz qaldyrady. Sondaı-aq, oblysta talapqa saı keletin jaǵajaılar sanaýly. Onyń biri Shıeli aýdany aýmaǵynda tirkelse, qalǵan ekeýi Qyzylorda qalasynda ornalasqan.