Qyzylordada eki aýyldyń ortasyndaǵy joldy sý shaıyp ketti
QYZYLORDA. QazAqparat - Keshe tolassyz jaýǵan jańbyrdan keıin Jańaqorǵan aýdanyndaǵy Keńes jáne Besaryq aýyldarynyń arasyn jalǵap jatqan avtomobıl jolyn sý shaıyp ketti.
Aýdan ákiminiń baspasóz qyzmeti habarlaǵandaı, mundaǵy «Besaryq» sý qoımasynyń syıymdylyǵy - 15 mln. tekshe metr. Aýa raıynyń qolaısyzdyǵynan sekýndyna 10-12 tekshe metr jańbyr sýy qoımaǵa quıylǵan. Jınalǵan sý qoımanyń avarııalyq sý qashyrtqysy arqyly eki aýyldyń ortasyndaǵy «Tastaq» arnasy arqyly Syrdarııa ózenine jiberildi.
«Avtojol astyndaǵy ótkeldiń sý ótkizgish kúıiniń tómendiginen sý joldy shaıyp ketti. Qaýipti oryndar qappen bógeldi. Jańbyr toqtaǵan boıda sý deńgeıi de tómendedi. Turǵyndar esh zııan shekken joq. Aýyl arasyndaǵy baılanys qalypqa keldi», delingen habarlamada.
