Qyzylordada egisti sýmen qamtamasyz etýge arnalǵan keste qatań qadaǵalanady
QYZYLORDA. QazAqparat - Qyzylorda oblysynda egisti sýmen qamtamasyz etý maqsatynda jasalǵan arnaıy keste qatań qadaǵalanady, dep habarlaıdy QazAqparat tilshisi.
Oblys ákimi Gúlshara Ábdiqalyqovanyń tóraǵalyǵymen ótken selektorlyq jıynda egisti sýarmaly sýmen qamtamasyz etý máselesi talqylandy. Aımaq basshysy óńirde oryn alǵan qýańshylyq máselesi asa kúrdeli ekenine nazar aýdardy. Ol óńirdiń aýyl sharýashylyq salasyna aıtarlyqtaı qıyndyq týǵyzyp otyr.
«Naryn-Syrdarııa aýmaǵynda jınalǵan sýdyń kólemi ótken jylmen salystyrǵanda 1 mlrd 878 mıllıon tekshe metrge kem. Osyǵan baılanysty oblysta vegetatsııalyq kezeńde egindi qajetti sýmen qamtamasyz etý maqsatynda tıisti sharalar qabyldandy. Egindi áli bir aıdan astam ýaqyt boıy sýmen qamtamasyz etýimiz tıis. Sondyqtan másele kún tártibinen túsken joq. Áli de ózekti ekenin aıta ketkenimiz abzal», - dedi oblys ákimi selektorlyq jıynda.
Jıynda oblystyq aýyl sharýashylyǵy basqarmasynyń basshysy Talǵat Dúısebaev sýarmaly sýmen qamtý jumystaryn, «Qazsýshar» respýblıkalyq memlekettik kásipornynyń Qyzylorda fılıaly dırektory Hamıt Bıimbetov sý aıdyndarynyń ahýalyn baıandady. Cýarmaly sýdy tıimdi paıdalaný maqsatynda oblysta 93 sý qondyrǵysy jumys jasaýda.
Osy oraıda oblys basshysy Qyzylorda qalasy jáne aýdan ákimderine egisti sýdan qaldyrmaýǵa basa nazar aýdarý qajet ekenin atap ótti. Osy maqsatta «Qazsýshar» respýblıkalyq memlekettik kásipornynyń Qyzylorda fılıaly tarapynan bekitilgen «Sý tapshylyǵy jaǵdaıyna baılanysty kanaldar boıynsha kezektestirip sýlandyrý» kestesi qatań saqtalýy tıis. Oǵan qosa sý berý kózderine sý tartatyn qondyrǵylar ornatýdy mindetteldi. Bul jumystarǵa paıdalanylatyn jáne sýarmaly sýmen tolyqtaı qamtamasyz etý úshin dızel otynyn jetkizý máselesi de ákimder nazarynan tys qalmaýy talap etiledi.
«Qazsýshar» respýblıkalyq memlekettik kásipornynyń Qyzylorda fılıaly mamandary Syrdarııa ózeni arqyly egiske alynatyn sýdy kestege sáıkes bólinýin qadaǵalaıdy. Al Qarmaqshy, Qazaly jáne Shıeli aýdandarynda kollektorlarǵa qoıylatyn sý tartý qondyrǵylaryn 20 shildege deıin aıaqtaý júkteldi. Oǵan qosa kásiporyn mamandaryna magıstraldy kanaldardy jedel túrde tazalaý jóninde tapsyrma berildi. Satyp alynatyn 43 dana nasos qondyrǵysy eldi mekenderge jedel jetkizý qadaǵalanady.
Eske salsaq, Qyzylorda oblysynda jol jelisin damytý jaqsara tústi.
