Qyzylordada dzıýdodan el birinshiligine 400-den astam sportshy qatysady
ASTANA. QazAqparat - 16 qarasha kúni Qyzylordada dzıýdodan erler men áıelder arasynda kezekti Qazaqstan chempıonaty jáne el kýbogy jarystary bastalady, dep habarlaıdy Qazaqstan dzıýda federasııasynyń baspasóz qyzmeti.
Dúbirli básekege Astana, Almaty qalalary men barlyq oblystardan 400-den asa sportshylar 14 salmaq dárejesinde júldelerdi sarapqa salady (7 er jáne 7 áıelder arasynda.
Olardyń arasynda álem chempıonatynyń kúmis júldegerleri, Batys qazaqstandyq Azamat Muqanov, aqtóbelik Rýstam Ybraev, bıylǵy Rıo-de Janeıro qalasynda ótken Olımpıada oıyndarynyń qatysýshylary: qaraǵandylyq Jansaı Smaǵulov, ońtústikqazaqstandyq Dıdar Hamza, Azııa chempıonatynyń qola júldegerleri mańǵystaýlyq Eldos Jumahanov, qaraǵandylyq ardager palýan Erjan Shynkeev, jasóspirimder Olımpıada oıyndarynyń chempıony, tuńǵysh álem chempıony, qyzylordalyqtar Baýyrjan Jaýyntaev, jastar arasynda álem chempıony Maǵjan Shamshadın, jastar arasynda Azııa chempıony Jaqsybek Jeńisbek, Azııa chempıony, Olımpıada oıyndarynyń qatysýshysy, Almaty qalasynan Marıan Ýrdabaeva, Ýnıversıada oıyndarynyń qola júldegeri, Almaty oblysynyń sportshysy Janar Qashqyn jáne Azııa oıyndarynyń qola júldegeri, shyǵys qazaqstandyq dzıýdoshy Gúljan Isanovalar bar.
Jarys qorytyndysy boıynsha kelesi jylǵa erler men áıelder Qazaqstan ulttyq qurama komandasy jasaqtalady.
Sondaı-aq, el chempıonaty aıaqtalǵannan keıin 19 qarashada Qazaqstan kýbogy jarystary ótedi. Jarystyń saltanatty ashylýy 16 qarasha saǵ.10.00-de, bastalýy 10.30-da Qyzylorda qalasyndaǵy «Muz aıdyny» sport kesheninde ótedi.
