Qyzylordada dúnıege kelgen azamat Tallın meri boldy
QYZYLORDA. QazAqparat - Estonııa astanasy - Tallınde 11 sáýirde qala merine saılaý ótti. Onda Qazaqstanda dúnıege kelgen Mıhaıl Kylvart jeńiske jetti, dep habarlaıdy QazAqparat tilshisi.
Ol qala basshysy qyzmetine saılaýǵa túsken jalǵyz úmitker bolǵan edi. Onyń kandıdatýrasyn Tallın qalasyndaǵy Tsentrıst partııasy usynǵan. Qala merin saılaýǵa baılanysty Tallın qalalyq jınalysynyń kezekten tys sessııasy ótkizildi. Oǵan qatysqan depýtattardyń basym bóligi Qyzylorda qalasynda dúnıege kelgen Mıhaıl Kylvartke senim bildirdi. Oǵan halyq qalaýlylary qatarynan 45 depýtat úmit artty. Saılaýdyń negizgi talaby boıynsha mer ataǵyn alý úshin kem degende 40 daýys jınasa jetkilikti bolatyn.
Mıhaıl Kylvart 1977 jyldyń 24 qarashasynda Qyzylorda qalasynda dúnıege kelgen. Ómirbaıan derekterine súıensek, ol úsh jasynan bastap Tallınn qalasynda ómir súrip keledi. Ol 1996 jyldan bastap Estonııa taekvondo odaǵyn qurdy. Uzaq jyldar boıy bapkerlikpen aınalysty.
Mıhaıl Kylvart taekvondo, kıkboksıng jáne boks boıynsha birqatar jarystarǵa qatysyp, júldeli orynnan kórindi. 1999 jyldan bastap saıası salada túrli qyzmet atqaryp keledi. 2016 jyldan beri Tallın qalasynyń sport, mádenıet, ıntegratsııa jáne bilim jónindegi vıtse-meri qyzmetin atqarǵan.
