Qyzylordada Dýlat Isabekovtiń «Eski úıdegi eki kezdesý» pesasy qoıyldy

QYZYLORDA. QazAqparat-Qyzylordada  «Týǵan jer» jobasy aıasynda ótip jatqan is-sharalar N. Bekejanov atyndaǵy teatrda Dýlat Isabekovtiń «Eski úıdegi eki kezdesý» dramasynyń qoıylymymen jalǵasty, dep habarlady QazAqparat tilshisi.

Erterekte jazylǵan bul pesa ómirdiń ózinen alynǵan. Qashanda shynaıylyqty qaz-qalpynda beıneleıtin dramatýrg bul joly da shıelenisken ómir sátterin dál aıshyqtaı alǵan. Shyǵarmada  eki taǵdyrdyń ómirlik joly eski úıde túıisedi. Bir shetinde týǵan jerin ańsap kelgen Aıtóre bolsa, ekinshi shetinde jalǵyz balasy syrtqa ketse de, úmitin úzbegen jalǵyz basty ana. 20 jyldy artqa tastap Almatyǵa at basyn tiregen Aıtóreniń oıynan kezinde ózi turǵan eski úıi keter emes. Árıne, týǵan jer men turǵan jeriń árdaıym ystyq qoı.

  Dostyq pen mahabbatty sıpattaıtyn jandy kórinister kórermenin beı-jaı qaldyrǵan joq. Pesa aıaqtalǵan sátti  jurtshylyq oryndarynan turyp qol soqty. Shynaıy ónerge degen qurmet osy bolsa kerek.