Qyzylordada dúken urlyǵyn kásip etken qaraqshylyq top ustaldy
QYZYLORDA. QazAqparat - Qyzylorda qalasynda dúkenderdi tonaýdy kásip etken qaraqshylyq top qolǵa tústi, dep habarlady OІІD baspasóz qyzmetinen.
ІІD habarlaýynsha, Qyzylorda qalasynda ornalasqan «Lombard» JShS mekemesiniń qyzmetkeri «102» qyzmetine naýryz aıynyń 4-nen 5-ne qaraǵan túni belgisiz bireýlerdiń osy mekemeniń tereze toryn maıystyrý arqyly kirip, kepilde jatqan 6 dana qundyz tondy, 2 dana uıaly telefon jáne 1 dana teledıdar urlaǵandyǵyn habarlaǵan.
Birneshe kúnnen keıin taǵy bir jábirlenýshiden oblys ortalyǵynda ornalasqan tele-radıo sheberhanasynan belgisiz bireýlerdiń avtokólikke arnalǵan jalpy quny 2 mln. 131 myń 500 teńge turatyn ártúrli radıolar men magnıtolalardy urlaǵany jóninde shaǵym túsedi.
Osy qylmystarǵa baılanysty Qyzylorda oblystyq ishki ister departamenti krımınaldyq polıtsııa basqarmasy men qalalyq ishki ister basqarmasy krımınaldyq polıtsııa bóliminiń qyzmetkerlerinen jedel túrde jumys toby qurylyp, QІІB-nyń KPB bastyǵy, polıtsııa maıory Ázız Shaǵyrov pen aǵa jedel ýákil, polıtsııa kapıtany Baǵdat Nurymbetovtiń kásibı sheberligi men qyraǵylyǵynyń nátıjesinde osy qylmysqa qatysy bar degen kúdikpen 21 men 25 jas shamasyndaǵy 4 qala turǵyny quryqtalyp, QІІB ýaqytsha ustaý abaqtysyna qamaldy.
Aldyn-ala tergeý barysynda kúdiktilerdiń basqa da ár túrli 14 dúken urlyǵyna tikeleı qatystary bar ekendikteri anyqtaldy. 16 dúkende oryn alǵan urlyqtardyń jalpy shyǵyn somasy 5 mln. teńgeden astam, olardyń 70 paıyzy óz ıelerine qaıtaryldy.
Qazirgi tańda Qyzylorda QІІB tergeý bólimi sezikti azamattardyń ústinen Qazaqstan Respýblıkasy Qylmystyq kodeksiniń 175-babynyń 3-bóligimen qylmystyq is qozǵady, tergeý amaldary júrgizilýde.
