Qyzylordada dızel otynyn zańsyz satqan kásipkerge sot úkimi shyqty

QYZYLORDA. QazAqparat - Qyzylorda oblysynda qujaty joq dızel otynyn ótkizý kezinde ustalǵan jeke kásipkerge qatysty sot úkimi shyqty, dep habarlaıdy QazAqparat tilshisi.

Atalǵan zańbuzýshylyq oblystyq ekonomıkalyq tergep-tekserý departamenti júrgizgen jedel-izdestirý sharalary barysynda anyqtaldy.

Kásipker 2020 jyldyń qazany men 2021 jyldyń naýryzy aralyǵynda asa iri mólsherde qylmystyq jolmen alynǵan múlikti zańdastyrý arqyly tabys tabý áreketin júzege asyrǵan. Dızel otynyn birneshe kelisimshart negizinde satyp alyp, óz qoımasynda saqtaý arqyly memlekettik 21 mekemege joǵary baǵamen jetkizip otyrǵan. Sot-ekonomıkalyq saraptama qorytyndysy boıynsha qujatsyz tasymaldap-ótkizilgen dızel otyny úshin anyqtalǵan shyǵyn kólemi 30 mln. 68 myń teńgeni qurady.

«Qylmystyq is Syrdarııa aýdandyq sotynyń qashyqtan ótken ashyq sot otyrysynda qaraldy. Jeke kásipkerge QR (Qylmystyq kodeksiniń 197 baby 4-bóliginiń 2) tarmaǵymen jáne 218 baby 1-bóligimen kózdelgen qylmystyq quqyq buzýshylyqty jasaǵany úshin úsh jyl merzimge bas bostandyǵynan aıyrý jazasy shartty túrde taǵaıyndaldy. Jaza merzimine probatsııalyq baqylaý belgilendi», - dep málim etti Qyzylorda oblystyq ekonomıkalyq tergep-tekserý departamentinen.

Eske salsaq, Qyzylordada qarjy pıramıdasyn qurǵandar 5 jylǵa sottaldy.